ئەفیخای ئەدرەعی، گوتەبێژی سوپای ئیسرائیل، ڕایگەیاند هێزەکانیان لە باشووری سووریا شانەیەکی چەکدارییان دەستگیر کردووە کە لە لایەن ئێرانەوە ئاراستە کراوە.
ئەدرەعی لە پەیجی فەرمیی خۆی لە فەیسبووک بڵاوی کردەوە، هێزەکانی لیوای ٤٧٤ی سەر بە فیرقەی ٢١٠ی سوپای ئیسرائیلی، لە هەردوو ناوچەی “ئوم ئەلوقس” و “عەین ئەلبەسەلی” لە باشووری سووریا، ئۆپەراسیۆنێکی تایبەتیان ئەنجام داوە.
بە گوێرەی گوتەکانی ئەدرەعی، ئۆپەراسیۆنەکە بە هاوکاریی لێکۆڵەرە مەیدانییەکانی یەکەی ٥٠٤ ئەنجام دراوە و لەسەر بنەمای زانیاریی هەواڵگری بووە کە لە ماوەی حەفتەکانی ڕابردوودا لە ئەنجامی لێکۆڵینەوەکاندا بەدەست هاتوون.
گوتەبێژی سوپای ئیسرائیل ئاشکرای کردووە کە لە شوێنی ئۆپەراسیۆنەکەدا دەست بەسەر بڕێک چەک و نارنجۆکی دەستیدا گیراوە.
