فەیسەڵ بن فەرحان وەزیری دەرەوەی سعوودیە ئاساییبوونەوەی پەیوەندییەکان لەگەڵ ئیسرائیل بەدی نایەت، تا شەڕی غەززە کۆتایی پێ نەیەت و دەوڵەتی فەڵەستینی دانەمەزرێندرێت.
فەیسەڵ بن فەرحان لە کۆنگرەیەکی ڕۆژنامەوانیدا ڕایگەیاند، ئاساییبوونەوەی پەیوەندییەکان لەگەڵ ئیسرائیل بەدی نایەت تا شەڕی غەززە نەوەستێت و ئازارەکانی فەڵەستینییەکان کۆتایی پێدێت، چونکە هیچ متمانە و هۆکارێک نییە بۆ ئاساییکردنەوەی پەیوەندییەکان لە کاتێکدا کوشتن و وێرانکاری لە کەرتی غەززە بەردەوامە.
وەزیری دەرەوەی سعوودیە ئاماژەی بەوەش کرد، دوای ئەوەی باس لە دامەزراندنی دەوڵەتی فەڵەستین دەکرێت، ئەوکات دەتوانین باس لە ئاساییکردنەوەی پەیوەندییەکان بکەین.
گوتیشی: دەبێت یەک نوێنەری گەلی فەڵەستین هەبێت ئەویش دەسەڵاتی فەڵەستینە، داننان بە دەوڵەتی فەلەستین ئەرکێکی لە مێژینەیە و نابێت بە ڤیتۆی ئیسرائیلەوە ببەسترێتەوە.
فەیسەڵ بن فەرحان، باسی لەوەش کرد، سعوودیە پێی وایە کە چارەسەری دوو دەوڵەت کلیلی سەقامگیری ناوچەکەیە.