ناوەندەکانی لێکۆڵینەوە و بیرکردنەوە لە تورکیا و باکووری کوردستان ڕای دەگەیەنن، کورد باوەڕی وایە دەوڵەت کێشەکە چارەسەر ناکات و تورکیش متمانەی نییە پارتی کرێکارانی کوردستان (پەکەکە) چەک دابنێت. بۆیە جەخت دەکەنەوە کە پێویستە حکوومەت هەنگاوی کرداری بنێت. بەرپرسێکی یەکێک لە ناوەندەکانی لێکۆڵینەوە دەڵێت، هەستی کوردایەتی زۆر بەرز بووەتەوە و پێویستە دەوڵەت و حکوومەت بەپێی ئەم ڕاستییە نوێیە، گۆڕانکاری لە خۆیاندا بکەن و یاساکان پەرە پێ بدەن.
کۆمیسیۆنی پرۆسەی ئاشتی لە دوازدەهەمین کۆبوونەوەی خۆیدا میوانداریی ناوەندەکانی لێکۆڵینەوە، ڕاپرسی و بیرکردنەوەی کرد. لە کۆبوونەوەکەدا، ئەو ناوەندانە دەرەنجامی لێکۆڵینەوەکانیان پێشکەش بە کۆمیسیۆنەکە کرد و وەڵامی پرسیارەکانیان دایەوە.
بەپێی بۆچوونی ناوەندی لێکۆڵینەوەی سیاسی، ئابووری و کۆمەڵایەتی (SETA) کە نزیکە لە حکوومەت، گرنگترین خاڵەکان ئەمانەن:
-بێدەنگکردنی چەک هەنگاوی یەکەمە و پێویستە پرۆسەکە بە یاسا بەهێز بکرێت.
-پرۆسەکە تەنها کۆتاییهێنان بە پەکەکە نییە، بەڵکوو دەرفەتێکە بۆ دیموکراسیبوون و گەشەپێدان.
-هاووڵاتییان گومانیان هەیە ئەگЕР پرۆسەکە سەرکەوتوو نەبێت، توندوتیژییەکان زیاد دەکەن.
-چاوەڕوانیی ٧٧٪ی هاووڵاتییان لە پرۆسەکە، بەرقەرارکردنی ئاشتی و ئاسایشە.
نابێت سووریا ببێتە هێڵی سوور و مەرجی سەرەکی بۆ پرۆسەکە.
لەلایەن خۆیەوە، سەرۆکی ناوەندی لێکۆڵینەوەکانی دیجلە (DÎTAM) جەخت لەسەر ئەم خاڵانە دەکاتەوە:
-پێویستە تورکەکان بۆ پرۆسەکە ڕازی بکرێن و داواکاریی دادپەروەرانەی کورد جێبەجێ بکرێت.
-پرسی کورد، پرسی ناسنامە، یەکسانی، مافناسی و دیموکراسییە.
پێویستە مافی هیوا و ئومێد بەبێ جیاوازی بۆ هەموو کەسێک دەستەبەر بکرێت.
بەپێی بۆچوونی ناوەندی لێکۆڵینەوەی “ڕاوێست” (Rawest):
-ئاستی شارنشینی و خوێندەواریی کورد بەرز بووەتەوە و لە شارە گەورەکانی تورکیادا نیشتەجێ بوون.
-کورد زیاتر خاوەندارێتی لە زمان و کولتووری خۆی دەکات و هەستی کوردایەتی بەهێزتر بووە.
-٦٥٪ی کورد دژی بەکارهێنانی چەکن، بەڵام ١٥٪ پێیان وایە بۆ بەدەستهێنانی ماف، چەک پێویستە.
-کورد باوەڕ ناکات حکوومەت هەنگاوی کرداری بنێت و تورکیش باوەڕ ناکات پەکەکە چەک دابنێت.
- ئەگەر سەڵاحەدین دەمیرتاش ئازاد نەکرێت، متمانە بە پرۆسەکە دروست نابێت.
-هەروەک چۆن بەرپرسێکی تورک دەتوانێت سەردانی ئامەد بکات، دەبێت مەزڵووم عەبدیش بتوانێت سەردانی ئەنقەرە بکات.
- با سەرۆکی پەرلەمان لەگەڵ ئامەدییەکاندا سەیری یارییەکی یانەی ئامەدسپۆر بکات.