پەرلەمانی عێراق داوا له وەزارەتی ناوخۆ دەکات سڕکردنی باری شارستانیی کوردانی فەیلی هەڵبگرێت

ئەنجومەنی نوێنەرانی عێراق، نووسراوێکی ئاراستەی وەزیری ناوخۆی فیدڕاڵی کرد بۆ چارەسەرکردنی پرسی سڕکردنی تۆمارەکانی باری شارستانیی کوردانی فەیلی.

لە راگەیەندراوەکی نووسینگەی شاخەوان عەبدوڵڵا، جێگری سەرۆکی ئەنجومەنی نوێنەران، هاتووە: “بە ئامانجی بەدیهێنانی دادپەروەری و گەڕاندنەوەی ماف بۆ خاوەنە شەرعییەکانیان و لادانی زیان و ستەم، شاخەوان عەبدوڵڵا نووسراوێکی ئاراستەی وەزیری ناوخۆی فیدڕاڵی کردووە سەبارەت بە هاووڵاتییانی کوردی فەیلی کە تۆمارەکانی باری شارستانییان لە فەرمانگەی باری شارستانی لە قەزای خانەقین و مەندەلی و فەرمانگەكانی تر سڕ کراون و لە سەردەمی رژێمی پێشوو دەركراون، بە پێی یاسا دەبێت رەگەزنامەكەیان بۆ بگەڕێندرێتەوە.”

له راگەیەندراوەکەدا هاتووه: “شاخەوانی عەبدوڵڵا داوای لە وەزارەتی ناوخۆ کرد کە بەدواداچوون بۆ ئەم دۆسیەیه بکات و سڕکردن لەسەر تۆمارەکانی باری شارستانی هەڵبگرێت، هەروەها ستەم لەسەر کوردانی فەیلی لاببرێت، کە زۆر و بۆ ساڵانێکی درێژ ئازاریان چەشتووە و قوربانیی گەورەیان داوە لەبەر وابەستەیی نەتەوەیی و نیشتمانییان.”