سەرچاوەیەکی ئاگادار، ئەو دۆسیانەی ئاشکرا کرد کە ئیسماعیل قائانی، فەرماندەی فەیلەقی قودسی سەر بە سوپای پاسدارانی ئێران، لە دوایین سەردانیدا بۆ بەغدا گەنگەشەی کردوون و روونیکردەوە کە دیارترینیان پێکهاتەی گرووپە چەکدارەکان بووە.
ئەو سەرچاوەیە بە شەفەق نیوزی راگەیاند: “لە نێو ئەو تەوەرانەی کە قائانی لەگەڵ حکومەتی عێراق و سەرکردەکانی چوارچێوەی هەماهەنگی و هەندێک لە سەرکردەکانی گرووپە چەکدارەکاندا گەنگەشەی کردوون، بریتی بوون لە پێکهاتەی گرووپە چەکدارەکان، بارودۆخی ئەمنی و سیاسی ناوچەکە بۆ بڕینی ڕێگه و ڕێگریکردن لە پلانی ئیسرائیل بۆ هێرشکردنە سەر عێراق یان ئاراستەکردنی لێدانی سەربازی بۆی.”
سەرچاوەکه گوتی: “لەو دۆسیەیەدا بۆچوونی هاوبەش لەنێوان عێراق و تاراندا هەیە، لەڕێگەی هێورکردنەوە و دابەخۆداگرتن و کەمکردنەوەی ئامانجگرتنی بەرژەوەندییە ئەمریکییەکان لەم قۆناغەی ئێستادا، لەپاڵ بەرزکردنەوەی ئاستی هاوکاریی هاوبەش لەنێوان بەغدا و تاران لە دۆسیەی ئەمنی و سیاسی و دوورخستنەوەی مەترسی و بەدوورگرتنی ناوچەکە لە جەنگی داهاتوو یان پێشبینیکراو.”
هەروەها گوتی: “قائانی کۆبوونەوەی چڕ و پڕی لەگەڵ هەموو لایەنە چالاک و کاریگەرەکان لە بڕیاری سیاسی و سەرکردەکانی پارتە سەرەکی و گرنگەکاندا ئەنجامدا، هەروەها چاوی بە سەرکردەکانی گرووپە چەکدارەکان بە کۆمەڵ و بە جیا کەوت و تیایدا جەخت کرایەوە لەسەر هێورکردنەوە و رێکخستنی چەک، و پابەندبوون بە جێبەجێکردنی رێککەوتن و لێکگەیشتنە هاوبەشەکانی نێوان هەردوو وڵات.”