کۆمیسیۆنی هەڵبژاردنەکانی عێراق، رێژەی بەرایی بەشداری لە هەڵبژاردنی ئەنجومەنی نوێنەرانی راگەیاند، ئەمەش دوای جیاکردنەوەی 99.9%ی کۆی بنکەکانی دەنگدان.
کۆمیسیۆن خشتەی ئاماری رێژەی بەشداری له هەڵبژاردنی بڵاوکردەوه و نیشانی دا کە کۆی رێژەی بەشداری لە دەنگدانی گشتی گەیشتووەتە 54.35%، دوای ئەوەی 10,904,637 دەنگدەر دەنگیان داوە لە کۆی 20,063,773 دەنگدەری تۆمارکراو.
پارێزگاکانی هەرێمی کوردستان و پارێزگای نەینەوا بەرزترین رێژەی بەشدارییان تۆمار کردووە، بە شێوەیەک پارێزگای دهۆک بە رێژەی 76.07% لە پێش پارێزگاکانەوە بووە، دوای ئەو پارێزگای هەولێر دێت بە رێژەی 69.02%، پاشان پارێزگای نەینەوا بە رێژەی 64.07%.
هەروەها ئامارەکان نیشانیان دا کە پارێزگاکانی سلێمانی و هەڵەبجە رێژەی بەشدارییان 64.12% و 56.87% بووه.
رێژەکانی بەشداری لە پارێزگاکانی ناوەڕاست و باشوور جیاواز بوون، بە شێوەیەک پارێزگای سەلاحەدین 66.44%، ئەنبار 65.93%، بەسرە 50.21%، زیقار 47.94%، و قادسیە 48.39%ـیان تۆمار کردووە، لە کاتێکدا کەمترین ڕێژەی بەشداری لە پارێزگاکانی میسان بە 40.11% و بابل بە 49.82% بووە.
لە بەغدای پایتەختیش رێژەی بەشداری لە بەشی رەسافە گەیشتووەتە 41.55% و لە بازنەی کەرخ گەیشتووەتە 53.27%.
سەبارەت بە دەنگدانی تایبەتی هێزە چەکدارەکان و کارمەندانی هێزە ئەمنییەکان، کە پێشتر لە 11ی ئەیلوول/سێپتێمبەر ئەنجامدرا، بەشدارییەکی بەرچاوی بەخۆوە بینی بە ڕێژەی 82.52%، بە شێوەیەک 1,084,289 کەس لە کۆی 1,313,980 کەس دەنگیان دا.
هەروەها دەنگدانی ئاوارەکان رێژەیەکی بەشداری بەرزی تۆمار کرد بە 77.35%، کە 27,527 دەنگدەر لە کۆی 35,538 دەنگدەری تۆمارکراو دەنگیان دا.
بە تێکەڵکردنی ئەم ژمارانە، کۆمیسیۆن رایگەیاند کە کۆی ژمارەی دەنگدەران – بە پشتبەستن بە ئەنجامە بەراییەکانی بنکە گشتییەکان و کۆی بنکەکانی دەنگدانی تایبەت و ئاوارەکان – گەیشتووەتە 12,009,453 دەنگدەر لە کۆی 21,404,291 دەنگدەر، بەمەش هەڵبژاردنەکە کۆی رێژەی بەشداری سەرەتایی بە 56.11% تۆمار کرد.
