ئەمڕۆ چوارشەممە، ٢٤ی کانوونی یەکەمی ٢٠٢٥، ئومێد خۆشناو، پارێزگاری هەولێر، لە کۆنگرەیەکی ڕۆژنامەوانییدا دەستپێکردنی قۆناغێکی نوێی پڕۆسەی دابەشکردنی زەوی بەسەر فەرمانبەرانی سنووری پارێزگاکە ڕاگەیاند، کە لە قۆناغی یەکەمدا نزیکەی دوو هەزار فەرمانبەر لێی سوودمەند دەبن.
پارێزگاری هەولێر ئاماژەی بەوە کرد کە ئەم هەنگاوە گرنگە دوای ١٥ ساڵ لە ڕاوەستانی پڕۆسەکە دێت و لەسەر بڕیاری مەسروور بارزانی، سەرۆکی حکوومەتی هەرێمی کوردستان جێبەجێ دەکرێت. بڕیارەکە سەرجەم فەرمانبەرانی هەردوو کەرتی سەربازی و شارستانی دەگرێتەوە و وەک هەوڵێک بۆ دەستەبەرکردنی مافی ئەو فەرمانبەرانە دەبینرێت کە ساڵانێکی درێژە خزمەت دەکەن.
ئومێد خۆشناو دەربارەی کوالیتی و نەخشەسازیی زەوییەکان ڕوونی کردەوە، ئەو زەوییانەی دابەش دەکرێن بە شێوەیەکی سەردەمیانە دیزاین کراون و هەموو پێداویستییەکانی ژیان و خزمەتگوزارییە گشتییەکانیان تێدا جێگیر کراوە. هەروەها ئاشکرای کرد کە پلانی ستراتیژیی حکوومەت ئەوەیە لە داهاتوودا ژمارەی زەوییە دابەشکراوەکان بگاتە ١٢٠ بۆ ١٢٥ هەزار پارچە زەوی، تاوەکو زۆرترین ژمارەی فەرمانبەران لەم مافە سوودمەند بن.
لە کۆتایی کۆنگرە ڕۆژنامەوانییەکەدا، پارێزگاری هەولێر دڵنیایی دایە فەرمانبەرانی گرێبەست و ڕایگەیاند کە پڕۆسەکە بەردەوام دەبێت و ئەوانیش بەگوێرەی ڕێنماییەکان و دوای تەواوبوونی ڕێکارە یاساییەکان، زەوییان پێ دەدرێت و لە پڕۆسەکە بێبەش نابن.