عەباس عێراقچی، وەزیری دەرەوەی ئێران، پێشنیوەڕۆی ئەمڕۆ گەیشتە ئیستانبوڵ و لەلایەن بەڕێوەبەری گشتیی ناوچەییی وەزارەتی دەرەوەی تورکیاوە پێشوازیی لێ کرا.
میدیاکانی ئێران بڵاویان کردووەتەوە عێراقچی لەم سەردانە یەک ڕۆژەیەدا لەگەڵ هاوتا تورکیایییەکەی خۆی سەبارەت بە پەیوەندییە دووقۆڵییەکان و گۆڕانکارییە ناوچەیی و نێودەوڵەتییەکان گفتوگۆ دەکات و لەگەڵ ڕەجەب تەییب ئەردۆغان، سەرۆککۆماری تورکیاش کۆ دەبێتەوە.
سەردانی وەزیری دەرەوەی کۆماری ئیسلامی لە کاتێکدایە گرژییەکانی نێوان تاران و واشنتۆن توندتر بوونەتەوە و تورکیا و دراوسێکانی دیکەی ئێران لە هەڵگیرسانی جەنگ لە ناوچەکەدا نیگەرانن.
ئاژانسی هەواڵی فەڕەنسا دوێنێ لە زاری سەرچاوە دیپلۆماتییەکانەوە بڵاوی کردەوە لە میانەی سەردانەکەی عێراقچیدا، تورکیا پێشنیاز دەکات نێوەندگیری لە نێوان تاران و واشنتۆن بکات.
لە سەرەتای دەستپێکردنی ناڕەزایەتییە سەرتاسەرییەکان لە ئێران و هەڕەشەی ئەمریکا بۆ دەستێوەردانی سەربازی، تورکیا هەمیشە دژایەتیی خۆی بۆ هەر چەشنە هێرش و هەڵمەتێکی لەو شێوەیە دووپات کردووەتەوە.