وەزارەتی بازرگانی عێراق رایگەیاند، پارەی كرێی وەرگرتنی بایەعی بۆ هەر نەفەرێك تەنیا هەزار دینارە و لەوە زیاتر نییە.
وەزارەتەكە لە راگەیەندراوێکدا ئەمڕۆ چوارشەممە 4ی ئاداری 2026 بڵاویكردەوە، “بابەتی بەشەخۆراک بەتەواوی مسۆگەرە، دابەشکردنیشی بەپێی خشتە پەسەندکراوەکان بەردەوامە بۆ ئەوەی دڵنیابن لە گەیاندنیان بە ئاسانی بۆ هاوڵاتیان بەبێ کەموکورتی و دەستکاریکردن”.
لە راگەیاندراوەكەدا هاتووە، “تیمەکانی چاودێریکردن لە بەشی کۆنتڕۆڵی بازرگانی و دارایی بەردەوامن لە هەڵمەتە مەیدانییەکانیان بە هەماهەنگی لەگەڵ دەزگا ئەمنییەکان بۆ چاودێریکردنی کاری بریکارەکان و دۆزینەوەی سەرپێچییەکان، ئەمە جگە لە چاودێریکردنی بازاڕە بازرگانییەکان و وردبینیکردنی نرخی خۆراک”.
وەزارەتەکە جەختی لەوە کردەوە کە “نرخی بەدەستهێنانی کەلوپەلی بەشەخۆراکی مانگانە بۆ هەر کەسێک هەزار دینارە، بەبێ زیادکردن”.