وەزارەتی بەرگریی سریلانکا ڕایگەیاند، بەهۆی هێرشێکی ژێردەریاییی ئەمریکا بۆ سەر کەشتییەکی جەنگیی ئێران لە کەناراوەکانی سریلانکا لە زەریای هیندی، لانیکەم ١٠١ کەس بێسەروشوێن بوون. تا ئێستا ٣٢ کەس ڕزگار کراون و چەند تەرمێکیش لە ئاوەکە دەرهێنراون.
عەباس عێراقچی، وەزیری دەرەوەی ئێران، لە هەژماری خۆی لە تۆڕی کۆمەڵایەتیی ئێکس نووسیویەتی: “ئەمریکا لە دووریی دوو هەزار کیلۆمەتر لە کەناراوەکانی ئێرانەوە تاوانێکی گەورەی ئەنجام داوە.”
عێراقچی ئاماژەی بەوەش کردووە کە کەشتییەکە میوانی هێزی دەریاییی هیندستان بووە و بەبێ ئاگادارکردنەوە کراوەتە ئامانج؛ هەروەها هۆشداریی داوە کە ئەمریکا لەم کارەی پەشیمان دەبێتەوە. جێی ئاماژەیە کەشتیی “دەنا” یەکێکە لە نوێترین کەشتییە جەنگییەکانی ئێران و بەپێی گوتەی وەزیری بەرگریی ئەمریکا، دوێنێ لەلایەن ژێردەریایییەکی وڵاتەکەیەوە پێکراوە.