دۆناڵد ترەمپ، سەرۆککۆماری ئەمریکا، جارێکی دیکە لە بەرەوپێشچوونی دانوستانەکان لەگەڵ ئێران ڕەزامەندیی نیشان دا.
ترەمپ لە هەژمارێکی خۆیدا لە تۆڕی کۆمەڵایەتیی “ترووس سۆشیاڵ” نووسی: “دانوستانەکان لەگەڵ ئێران باش دەچنە پێش! یان ڕێککەوتنێکی ناوازە بۆ هەمووان دەبێت یان هیچ ڕێککەوتنێک نابێت.”
ناوبراو هاوکات هۆشداریی دا ئەگەر ڕێککەوتن بەدەست نەیەت، ئەمریکا بۆ بەرەی شەڕ دەگەڕێتەوە و “تەقەکردن لە هەموو کاتێک گەورەتر و توندتر دەست پێ دەکات و کەس ئەمەی ناوێت.”
سەرۆککۆماری ئەمریکا دانوستانەکانی لەگەڵ ئێران بە پەیمانی ئیبراهیمەوە بەستەوە و ئاماژەی بەو گفتوگۆیانە کرد ڕۆژی شەموو لەگەڵ سەرکردەکانی سعوودیە، ئیمارات، قەتەر، پاکستان، تورکیا، میسر، ئوردن و بەحرەین ئەنجامی دابوون و گوتی: “دوای هەوڵەکانی ئەمریکا بۆ چارەسەری ئەم پرسە ئاڵۆزە، دەبێت ئەم وڵاتانە ناچار بن هاوکات پەیمانی ئیبراهیم واژۆ بکەن.”
ترەمپ ئاماژەی بەوە کرد ئیمارات و بەحرەین ئێستا ئەندامی ئەم پەیمانەن و گوتیشی لەوانەیە لە نێوان قەتەر، پاکستان، تورکیا، میسر و ئوردن، یەک دوو وڵات پاساویان بۆ بەشدارینەکردن هەبێت، بەڵام ئەوانی دیکە “دەبێت ئامادە و خوازیار بن.”
ترەمپ گوتیشی دەبێت سعوودیە و قەتەر پێشەنگ بن و “دەستبەجێ” ئەم پەیمانە واژۆ بکەن.
سەرۆککۆماری ئەمریکا لە درێژەدا نووسی: “بێ چەندوچوون داوا لە هەموو وڵاتەکان دەکەم دەستبەجێ پەیمانی ئیبراهیم واژۆ بکەن و ئەگەر ئێرانیش لەگەڵ مندا ڕێککەوتن واژۆ بکات، جێی شانازی دەبێت ئەوانیش بچنە ناو ئەم هاوپەیمانییە جیهانییە بێوێنەیەوە.”