وەزارەتی بازرگانیی عێراق ڕایگەیاند، پڕۆسەی وەرگرتنی گەنمی ئەمساڵ لە 10 پارێزگای عێراق کۆتایی هاتووە و لە هەرێمی کوردستان و چەند پارێزگایەکی دیکە بەردەوامە.
ئەمڕۆ شەممە، 13ـی حوزەیرانی 2026، حەیدەر نووری گەرعاوی، بەڕێوەبەری گشتیی کۆمپانیای گشتیی بازرگانیی دانەوێڵە ڕایگەیاند، تا ئێستا بڕی 3 ملیۆن و 194 هەزار تۆن گەنم لە سەرجەم پارێزگاکانی عێراق وەرگیراوە، جگە لە هەرێمی کوردستان کە لە دوێنێوە پڕۆسەی وەرگرتنی گەنم تێیدا دەستیپێکردووە و کارکردن بۆ وەرگرتنی بەرهەمی جووتیاران بەردەوامە.
گەرعاوی ئاماژەی بەوەش کرد، پڕۆسەی وەرگرتنی گەنم لە 9 پارێزگای باشوور و پارێزگای بەغدا کۆتایی هاتووە، بەوەش کۆی ئەو پارێزگایانەی پڕۆسەکەیان تێدا ڕاگیراوە گەیشتە 10 پارێزگا. لە بەرامبەردا، لە 8 پارێزگای دیکە وەک ئەنبار، دیالە و ناوچەکانی دیکەی باکوور و ڕۆژئاوا، سایلۆکان بەردەوامن لە وەرگرتنی گەنم.
بەڕێوەبەری گشتیی کۆمپانیای بازرگانیی دانەوێڵە گوتیشی: “لە چەند ڕۆژی داهاتوودا وەرگرتن لە پارێزگاکانی دیالە و سەڵاحەدین ڕادەگیرێت، بەڵام پڕۆسەکە لە پارێزگاکانی کەرکووک، نەینەوا و هەر سێ پارێزگاکەی هەرێمی کوردستان بەردەوامی دەبێت.”
لە کۆتاییدا ئەوەشی خستەڕوو، کە بەپێی بڕیارێکی ئەنجوومەنی وەزیرانی عێراق، ئەو بڕە گەنمانەشی کە لە دەرەوەی پلانی کشتوکاڵین لە جووتیاران وەردەگیرێن و پڕۆسەی وەرگرتنی ئەو بڕانە بەپێی بڕیارەکە بەردەوامە.