پاپا لیۆی چواردەیەم، ڕێبەری کاتۆلیکەکانی جیهان، ڕۆژی چوارشەممە ١٧ی حوزەیران پێشوازیی لە ڕێککەوتنی نێوان ئێران و ویلایەتە یەکگرتووەکانی ئەمریکا بۆ کۆتاییهێنان بە جەنگی ڕۆژهەڵاتی ناوەڕاست کرد. ئەو ئەم هەنگاوەی بە ئەنجامی “هەوڵە ئومێدبەخشەکان لە ڕێگەی گفتوگۆ و دانوستان” ناو برد.
پاپا لە دیداری هەفتانەی خۆیدا لە ڤاتیکان، سوپاسی هەموو ئەو کەسانەی کرد لە پڕۆسەی دانوستانەکاندا ڕۆڵیان هەبووە. هیوای خواست ئەم ڕێککەوتنە بتوانێت بە بەهێزکردنی متمانەی دوولایەنە، ئاسایش و سەقامگیری، ڕێگەکانی گفتوگۆ و هاوکاریی نێوان گەلانی ڕۆژهەڵاتی ناوەڕاست پەرە پێ بدات.
ڕێبەری کاتۆلیکەکانی جیهان ئاماژەی بە جەنگی ئۆکرانیاش دا و نیگەرانیی خۆی بەرانبەر هەواڵە “بەئازارەکانی” ئەو ململانێیە دەربڕی و بۆ گەیشتن بە “ئاشتییەکی دادپەروەرانە و بەردەوام لە ڕێگەی گفتوگۆوە” دوعای کرد.
ناوبراو باسی لەوە کرد زۆرێک لە مەدەنییە بێتاوانەکان، کارمەندانی فریاگوزاری، کەنیسەکان و شوێنەوارە کولتوورییەکان لە ئاگری جەنگدا لەناو چوون. پاپ لیۆ لە کۆتاییدا گوتی لەگەڵ بنەماڵەی قوربانییان، برینداران و ئەو کەسانەدایە لەناو توندوتیژیدا بە ئازایەتییەوە بەردەوامن لە خزمەتکردن.