ئەمڕۆ دوو شەممە 18/8/2025 لەدیوانی وەزارەتی ناوخۆ لە هەولێر ڕێبەر ئەحمەد پێشوازی لە کاردیناڵ لویس ساکۆ پاتریارکی کلدان لەعێراق و جیهان و یاریدەرەکەی کرد لەدیدارەکەدا مستەفا قایتەوەنی ئەندامی مەکتەبی پەیوەندیەکانی کوردستانی و عێراقی پارتی ئامادە بوو .
ڕێبەر ئەحمەد وەزیری ناوخۆ وێڕای بەخێرهاتنی کاردیناڵ ساکۆ و یاریدەدەرەکەی کورتە باسێکی لەسەر بارودۆخی ئێستای کوردستان و ناوچەکە پێشکەش بەمیوانان کرد هەروەها باسی پاڵپشتی حکومەتی هەرێمی کوردستان و سەقامگیری ئاسایشی هاوڵاتیانکرد بەتایبەتیش لەژێر ڕۆشنای بڕیارو ڕاسپاردەکانی سەرۆک بارزانی و مەسرور بارزانی سەرۆک وەزیرانی کوردستان کەهەمیشە دووپاتی پشتیوانی حکومەتی هەرێمی کوردستان دەکەنەوە لەپێکەوەژیانی ئاشتیانەی نێوان پێکهاتەکانی کوردستان بەتایبەتی پاراستنی مافی خوشک و برایانی کریستیان و پێکهاتەکانی دیکە وەک وەزیری ناوخۆ ڕوونیکردەوە کوردستان چۆن لەڕابردوو ئێستا لانکەی پێکەوە ژیانی ئاشتیانە بووە لەداهاتووش ئاوا دەمێنێتەوەو ئەو پێکەوەژیانە بوەتە کەلتورێک و هەموو کوردستانیەک شانازی پێوە دەکات.
لەلای خۆشیەوە کاردیناڵ لویس ساکۆ پاتریارکی کلدان لەعێراق و جیهان سوپاسی وەزیری ناوخۆی کرد بۆ پیشوازی و ئەو بەرچاو ڕوونکردنەوانەی لەسەر بارودۆخی هەرێمی کوردستان و پارێزراوی ماف و ئازادی تاکە کەسی پێکهاتەکانی کوردستانکرد کاردیناڵ لویس ساکۆ سوپاس و پێزانینی خۆی و کەنیسەی کاسۆلیک و قەداسەتی پاپای ڤاتیکانی بۆ سەرۆک بارزانی و مەسرور بارزانی سەرۆک وەزیرانی کوردستان و حکومەت و گەلی کوردستان دووپاتکردەوە بۆ لەباوەش گرتنی ئاوارە کریستیانەکان و بەهەڵوێستێکی لەبیر نەکراوی مێژووی لەقەڵەمدا ڤاتیکان هەمیشە ئەو هەڵویستە بەرز دەنرخێنێ .
هەردوو لا هاوڕا بوون لەسەر برەودانی زیاتر بە کەلتورو فەرهەنگی پێکەوە ژیانی ئاشتیانەی نێوان پێکهاتەکان و کاردیناڵ لویس ساکۆ هیوای سەرکەوتن و خۆشگوزەرانی بۆ حکومەت و خەڵکی کوردستان خواست.
لەکۆتای دیدارەکەشدا وەک ڕێز گرتن لەهەوڵ و ماندوو وبونەکانی وەزیری ناوخۆی حکومەتی هەرێمی کوردستان کاردیناڵ لویس ساکۆ پاتریارکی کلدان لەعێراق و جیهان قەڵغانی ڕێزو پێزانینی کەنیسەی کاسۆلیکی بەخشیە ڕێبەر ئەحمەد وەزیری ناوخۆی حکومەتی هەرێمی کوردستان لەپای ئەو خزمەتەی پێشکەشی هەموو پێکهاتەکان و بەتایبەتیش کریستیانەکانی کوردستانی کردووە.
وەزیری ناوخۆ، بەکاردیناڵ ساکۆی ڕاگەیاند؛ ئەم ڕێزگرتنەی ئێوەو کەنیسەی کاسۆلیک هانمان دەدات گەرم و گوڕ تر لەجاران خزمەتی خوشک و براکانمان لەپێکهاتە جیاوازەکان بکەین.