بەهۆی بارینی بەفرێکی زۆر و تێکچوونی کەشوهەوا، هاتوچۆی گەشتیاران لە دەروازەی نێودەوڵەتی (زێت) لە نێوان هەرێمی کوردستان و تورکیا بۆ کاتێکی نادیار ڕاگیرا.
ڕۆژی پێنجشەممە 01ێ کانوونی دووەمی 2026، هۆبەی ڕاگەیاندنی بەڕێوەبەرایەتیی ئاسایشی دەروازە سنوورییەکان لە ئاگادارییەکدا ڕایگەیاند: “بەهۆی بارینی بەفرێکی زۆر و سەختیی ڕێگاکان و نالەباریی کەشوهەوا، لە لایەن هەردوو دەروازەی “دەرەجیک” لە تورکیا و “زێت” لە هەرێمی کوردستان، ئاگادار کراینەوە کەوا هاتوچۆ بۆ کاتێکی نادیار ڕاگیراوە.”
لە ئاگادارییەکەدا ئاماژە بەوەش کراوە، بەهۆی سەرما و بەفربارینەوە تەواوی ڕێگاکانی ئەو سنوورە بەستراون و بە هیچ شێوەیەک هاتوچۆی گەشتیاریی تێدا ئەنجام نادریت.
ئەم بڕیارە لە کاتێکدایە کە لەگەڵ دەستپێکی ساڵی نوێدا، شەپۆلێکی بەهێزی بەفربارین ناوچە شاخاوییەکانی هەرێمی کوردستانی گرتووەتەوە و ئاستەنگی زۆری بۆ هاتوچۆ لە دەروازە سنوورییەکان دروست کردووە.