وەزارەتی پەروەردە سەرجەم تاقیکردنەوەکانی ناو پۆلی ڕاگرت و مەرجێکیشی بۆ تاقیکردنەوە نێودەوڵەتییەکان دانا
وەزارەتی پەروەردەی حکومەتی هەرێمی کوردستان بڕیاری دا سەرجەم هەڵسەنگاندن و تاقیکردنەوەکانی ناو قوتابخانەکان ڕابگرێت و جەخت دەکاتەوە کە لەم قۆناغەدا قوتابییان بە هیچ شێوەیەک ناگەڕێنەوە ناو پۆلەکان.
لە نووسراوێکی رەسمیدا کە ئاراستەی سەرجەم بەڕێوەبەرایەتییە گشتییەکانی پەروەردە (هەولێر، سلێمانی، دهۆک، هەڵەبجە، گەرمیان، ڕاپەڕین، سۆران و زاخۆ) کراوە، وەزارەتی پەروەردە سەرجەم قوتابخانە حکومی، ناحکومی و نێودەوڵەتییەکانی ئاگادار کردووەتەوە کە لە دوای ڕاگەیاندنی پرۆسەی خوێندنی ئۆنلاینەوە، دەبێت پابەندی ئەم دوو خاڵە بن:
• راگرتنی تاقیکردنەوەکان: هەموو جۆرە هەڵسەنگاندن و تاقیکردنەوەیەکی ناو قوتابخانەکان بەتەواوی ڕادەگیرێت. بە هیچ شێوەیەک نابێت قوتابی و خوێندکار بگەڕێتەوە ناو قوتابخانە، و لەم قۆناغەدا تەنیا پرۆسەی خوێندنی ئەلیکترۆنی و ئۆنلاین بەردەوام دەبێت.
• چارەنووسی تاقیکردنەوە نێودەوڵەتییەکان: سەبارەت بەو تاقیکردنەوانەی کە کاتەکانیان بەستراوەتەوە بە دەرەوەی وڵاتەوە، وەزارەتی پەروەردە مەرجی داناوە کە هەر قوتابخانەیەک تاقیکردنەوەی نێودەوڵەتی هەبێت و پابەندبوونێکی لەسەر بێت، پێویستە پێشوەختە بە نووسراوی رەسمی وەزارەت ئاگادار بکاتەوە، تاوەکو کاری ئاسانکاری و ڕێگەپێدانی تایبەتی بۆ بکرێت.