ئەمڕۆ سێشەممە، 7/4/2026، مەسرور بارزانی، سەرۆکی حکوومەتی هەرێمی کوردستان، بەشداری لە پرسەی هەردوو شەهیدی گوندی زەرگەزەوی لە سنووری پارێزگای هەولێر کرد و پرسە و هاوخەمیی خۆی بۆ خانەوادە و کەسوکاری شەهیدانی گوندی زەرگەزەوی دەربڕی.
مەسرور بارزانی، لە پرێس کۆنفرانسێکی رۆژنامەوانیدا رایگەیاند: “جارێکی دیکە بەبێ پاساو هێرش کرایە سەر خەڵکی بێتاوانی هەرێمی کوردستان، دوو هاوژین شەهید بوون کە جێی داخی هەموو لایەکمانە، سەرەخۆشی لە جەنابی سەرۆک بارزانی و هەموو خەڵکی کوردستان دەکەین.”
گوتیشی: “ئەمە چەندین جارە بە بێ هۆ و پاساو هێرش دەکرێتە سەر هەرێمی کوردستان، بە دڵنیاییەوە ئەوەی دەستی بە خوێنی گەلەکەمان سوور بێت دوور یان نزیک بە سزای خۆی دەگات، ئێمە بەردەوام دەبین لەسەر رێبازی شەهیدانمان بۆ ئازادی و سەربەرزی گەلەکەمان، هەروەها بۆ پاراستنی خاک و وڵاتمان بەردەوام دەبین.”
سەرۆکی حکوومەت راشی گەیاند: “سوپاسی پشوودرێژی و هاوکاری خەڵکی هەرێمی کوردستان دەکەین، هیوادارین ئەم شەڕ و گرژییە بەرەو کۆتایی بڕۆن و خەڵکی ئێمە بە ئاواتی دێری خۆیان بگەن.”
هەروەها مەسرور بارزانی لە بارەی بەردەوامی هێرشەکان و هەڵوێستی حکوومەتی عێراق گوتی: “بە داخەوە تا ئێستا هیچ هەنگاوێکی کردەییان نەناوە بۆ راگرتنی ئەو هێرشانەی کە دەکرێنە سەر هەرێم.”
ئەوەشی خستە روو: “ئێمە لەگەڵ هەموو لایەنەکانی کۆمەڵگەی نێودەوڵەتی و هاوپەیمانان و دۆسەتەکانی خۆمان قسەمان کردووە، هەموویان پاڵپشتیی خۆیان بۆ هەرێمی کوردستان و بۆ خەڵکی بێ تاوانی هەرێمەکە دووپات کردووەتەوە، ئومێدەوارم بتوانن سنوورێک بۆ ئەو پەلامارانە دابنرێت کە دەکرێنە سەر هەرێمی کوردستان.”
لەبارەی هێرشەکانی ئێران بۆ سەر هەرێمی کوردستان، سەرۆکی حکوومەت ئاماژەی بەوە دا: “بە ڕاستی هیچ پاساوێک نییە بۆ ئەو پەلامار و هێرشانەی کە دەکرێتە سەر هەرێمی کوردستان، لەگەڵ لایەنە ئێرانییەکان قسە کراوە و گلییەکانی خۆمان پێ گەیاندوون و پێشمان گووتوون هەرێمی کوردستان بەشێک نییە لەو شەڕە و ئێمە مەترسی نین بۆ سەر هیچ لایەنێک، بەڵام بەراستی ئەوانەی پالاماری خەڵکی هەرێم دەدەن بەرانبەر بە خوا و ویژدانی خەڵک بەرپرسیارن، چونکە هیچ هۆکارێک نییە بۆ ئەوەی ئەو هێرشانە بکەن.”