ئیسماعیل عەدنان، وێنەگری ناوداری شاری دهۆک، وەک یەکەمین وێنەگری کورد بە فەرمی گەیشتە ویلایەتە یەکگرتووەکانی ئەمریکا بە مەبەستی پشکداریکردن و ڕووماڵکردنی یارییەکانی جامی جیهانی 2026.
ئیسماعیل عەدنان لە کاتی گەیشتنی بۆ خاکی ئەمریکا، بە شانازییەوە بە ئاڵای کوردستان و پۆشینی جلوبەرگی ڕەسەنی کوردییەوە دەرکەوت، ئەمەش سەرنجی میدیاکان و ئامادبووانی ڕاکێشا.
بڕیارە ئەم وێنەگرە کوردە لە چوارچێوەی چالاکییەکانی مۆندیالدا، وەک وێنەگرێکی دیاری ڕاگەیاندنی کوردی، دیمەن و ڕووداوە گرنگەکانی ئەم خولەی جامی جیهانی بە کامێراکەی تۆمار بکات و بیگوازێتەوە. ئەم هەنگاوەش وەک دەستکەوتێکی گرنگ بۆ ڕۆژنامەگەریی وەرزشیی کوردی و ناساندنی زیاتری کولتووری کوردستان لە نێوەندە نێودەوڵەتییەکاندا سەیر دەکرێت.