کۆمپانیای گووڵ سکاڵایەکی یاسایی فەرمی لە دادگای فیدراڵی ئەمریکا لە دژی گرووپێکی گەورەی تاوانکاری ئەلیکترۆنی چینی بە ناوی دراگۆن فۆرس تۆمار کرد دوای ئەوەی دەرکەوت کەمپینێکی بەربڵاویان بۆ دزینی زانیاری بەکارهێنەران لە سەرتاسەری جیهاندا بەڕێوەبردووە.
ئەم گرووپە چینییە تەکنەلۆژیای پێشکەوتووی ژیریی دەستکردیان بەکارهێناوە بۆ دروستکردنی ماڵپەڕ و ڕیکلامی وای واقیعی کە بە تەواوی لە خزمەتگوزارییە ڕاستەقینەکانی گووڵ بچێت و لەم ڕێگەیەوە بەرنامەی دژە ڤایرۆسی ساختە و ئەپی فۆتۆشۆپ و ئامرازەکانی تری ژیریی دەستکردیان بڵاوکردووەتەوە بۆ ئەوەی خەڵک متمانەی پێبکات و دایبگرێت.
بەپێی سکاڵاکەی گووڵ گرووپی دراگۆن فۆرس لە ڕێگەی ئەم ئەپە ساختانەوە زیانیان بە سەدان هەزار کەس گەیاندووە و توانیویانە تێپەڕەوشەی ئەکاونتەکان و زانیارییە بانکی و داراییەکانیان بدزن و کۆمپانیاکەش ڕایگەیاندووە کە ئەم جۆرە سکاڵایانە بۆ تێکشکاندنی ژێرخانی دارایی و تەکنیکی ئەم گرووپانەیە نەک تەنها ڕێگریکردنی کاتی چونکە ئەوان شێوازی زۆر ئاڵۆز بۆ خۆشاردنەوە بەکاردێنن.