وەزارەتی ناوخۆی هەرێمی کوردستان بە ئیمزای ڕێبەر ئەحمەد، وەزیری ناوخۆ ڕێنوێنییەکی نوێی دەرکرد، کە تێیدا بڕیار لەسەر دیاریکردنی شێوازی هەڵگرتن و خستنەڕووی مۆڵەتی شوفێری درا.
بڕیارەکە جەخت دەکاتەوە خستنەڕووی مۆڵەتی شوفێری دەبێت بە یەکێک لەم دوو شێوازە بێت: یەکەم: مۆڵەتی شوفێری بەشێوەی کارت. دووەم: مۆڵەتی شوفێری بەشێوازی دیجیتاڵی، کە لەسەر سەکۆی KRDpass لەسەر ئامێرە زیرەکەکانی پەیوەندیکردن بەردەستە.
لە ڕێنوێنییەکەی وەزارەتی ناوخۆدا تەواو ڕوونکراوەتەوە کە مۆڵەتی شوفێریی دیجیتاڵی هەمان هێز و بەهای یاسایی مۆڵەتی کارتەکەی هەیە و سەرجەم خەسڵەتە ئەلیکترۆنی و نیشانە تەکنیکییەکانی تێدایە.