سەرۆکی ڕووسیا فلادیمیر پوتین و سەرۆکی ئەمریکا دۆنالد ترامپ پەیوەندییەکی تەلەفۆنییان ئەنجامدا کە نزیکەی یەک کاتژمێر و ٢٥ خولەک درێژەی کێشا، و لە ماوەی ئەو گفتوگۆیەدا جەنگی ئۆکرانیا تاوتوێ کرا، پێش بەڕێوەچوونی کۆبوونەوەی داهاتووی هاوپەیمانی ناتۆ لە تورکیا.
یوری ئۆشاکۆف، یاریدەدەری سەرۆکی ڕووسیا بۆ کاروباری دەرەوە، وتی پوتین لەو پەیوەندییەدا ڕاپۆرتێکی وردی لەسەر دۆخی جەنگی ئۆکرانیا پێشکەش کرد. بە وتەی ئەو، ترامپ ئامادەیی خۆی دەربڕی بۆ یارمەتیدان لە کۆتاییهێنان بە ململانێکە لە ماوەی کۆبوونەوەی ناتۆ لە تورکیا.
هەروەها، ئۆشاکۆف ئاماژەی بەوە کرد کە ستێڤ ویتکۆف، نێردراوی تایبەتی ئەمریکا، و جارید کوشنەر، زاوا و ڕاوێژکاری پێشووی ترامپ، ئامادەیی خۆیان دەربڕیوە بۆ سەردانی مۆسکۆ.
لە هەمان کاتدا، سەرچاوەیەکی ئاگادار بە ئاژانسی “تاس”ی وت و گوت ویتکۆف و کوشنەر ڕەنگە پێش کۆتایی مانگی ئاب بگەنە ڕووسیا، بەڵام هێشتا هیچ بەروارێکی دیاریکراو بۆ ئەو سەردانە نییە.
لە لایەکی دیکەوە، سەرۆکی ئۆکرانیا ڤۆلۆدیمیر زێلێنسکی، ڕایگەیاند کە لە ماوەی پشووەکانی ٤ی تەممووز گفتوگۆیەکی تەلەفۆنی لەگەڵ سەرۆکی ئەمریکا، دۆنالد ترامپ، ئەنجامداوە و داوای هەڵوێستێکی بەهێزتری ئەمریکای کردووە بۆ یارمەتیدان لە کۆتاییهێنان بە جەنگی ڕووسیا و ئۆکرانیا کە زیاتر لە چوار ساڵە بەردەوامە.
زێلێنسکی وتی گفتوگۆکە «زۆر باش» بوو و تێیدا دۆخی بەرەکانی شەڕیان تاوتوێ کرد. ئەو جەختی لەوەش کردەوە کە «هەلی ڕاستەقینە هەیە بۆ کۆتاییهێنان بە جەنگەکە، و ئیرادەی ئەمریکا ڕۆڵێکی چارەنووسساز دەبینێت.
سەرۆکی ئۆکرانیا هەروەها ئاماژەی بەوە کرد کە لەگەڵ ترامپ ڕێککەوتوون گفتوگۆکانیان لە کۆبوونەوەی ئەم هەفتەی هاوپەیمانی ناتۆ لە تورکیا بەردەوام بکەن.