ژمارەیەک لە دەستبەسەرکراوانی نێوەندێکی ڕاگرتنی کۆچبەران لە ویلایەتی تەکساسی ئەمریکا، بە دوو نێوەندی مافی مرۆڤیان گوتووە لەلایەن پاسەوانەکانەوە لێیان دراوە و لە خزمەتگوزاریی پزیشکی و پەیوەندی بە خێزان و پارێزەرەکانیان بێبەش کراون.
ئەم ڕاپۆرتە لەلایەن “دیدیبانی مافی مرۆڤ” و “یەکێتیی ئازادییە مەدەنییەکانی ئەمریکا” بڵاو کراوەتەوە و پشتی بە ٨٠ چاوپێکەوتن بەستووە؛ تیشک خراوەتە سەر دۆخی کەمپی “ئیست مۆنتانا” لە بنکەی سەربازیی فۆرت بلیس لە شاری ئێل پاسۆ.
لە ڕاپۆرتەکەدا هاتووە: “دەستبەسەرکراوانی ئەو کەمپە باسیان لە ئەشکەنجەی بەردەوام، بەکارهێنانی هێزی زیاد لە پێویست، بەدخۆراکی و دۆخی ناتەندروستیی ژیان کردووە.”
وەزارەتی تەناهیی نێوخۆی ئەمریکا لە بەیاننامەیەکدا ئەو ڕاپۆرتانەی بە “تەواوی ناڕاست” ناو برد و گوتی: “هیچ کام لە دەستبەسەرکراوان ڕووبەڕووی لێدان یان مامەڵەی خراپ نەبوونەتەوە و حکوومەت پاراستنی گیانی ئەوان بە هەند وەردەگرێت.” هەروەها جەختی کردەوە هەموو دەستبەسەرکراوان مافی یاسایی، خۆراک و چارەسەری پزیشکیی پێویستیان پێ دەگات.