نووسینگەی ڕاگەیاندنی بەڕێوەبەرایەتیی ئاسایشی عەدەن ڕایگەیاند بەرەبەیانی ڕۆژی چوارشەممە، بە دوو مووشەک لەلایەن گرووپی حوسییەکانەوە هێرش کراوەتە سەر فڕۆکەخانەی نێودەوڵەتیی عەدەن لە باشووری یەمەن، بەڵام هیچ زیانێکی گیانی لە هێرشەکە نەکەوتووەتەوە. ئەم هێرشە لە کاتێکدایە کە شەڕ و پێکدادانەکان لە کەناراوەکانی دەریای سوور و ناوچەکانی دەوروبەری گەرووی بابولمەندەب لەنێوان هێزەکانی حکوومەتی یەمەن بە پاڵپشتیی هاوپەیمانیی بەڕێبەرایەتیی عەرەبستانی سعوودی و هێزەکانی حوسیدا چڕ بوونەتەوە.
لەلایەکی دیکەوە، هاوپەیمانیی بەڕێبەرایەتیی سعوودییە ڕایگەیاند کە دوو مووشەکی بالیستیکی لە باشووری ئەو وڵاتە و باکووری شاری ڕیاز تێکشکاندووە. لە بەرامبەردا، یەحیا سەریع، وتەبێژی سەربازیی حوسییەکان ڕایگەیاند بە فڕۆکەی بێفڕۆکەوان فڕۆکەخانەی مەلیک خالیدیان لە ڕیاز و بە مووشەکی بالیستیک و درۆن فڕۆکەخانەکانی ئەبها و خەمیس مشەیتیان کردووەتە ئامانج و لە ئەنجامدا گەشتە ئاسمانییەکان پەکخراون.
سەریع هەروەها بانگەشەی ئەوەی کردووە کە لە ئۆپەراسیۆنێکی بەرفراواندا چەند بنکەیەکی سەربازییان لە ناوچەکانی جیزان و عەسیر کردووەتە ئامانج و زیانی گیانییان لێ کەوتووەتەوە. تا ئێستا عەرەبستانی سعوودی وەڵامی ئەم بانگەشانەی گرووپی حوسییەکانی نەداوەتەوە.
