ئەمڕۆ دووشەممە، 18ـی ئایاری 2026، پەرلەمانتار عەلی ئەنهیر سەرای، کشانەوەی خۆی لە هاوپەیمانی “ئاوەدانکردنەوە و گەشەپێدان”ـی محەمەد شیاع سوودانی، سەرۆکوەزیرانی پێشووی عێراق ڕاگەیاند و دووپاتیکردەوە کە وەک پەرلەمانتارێکی سەربەخۆ لەناو ئەنجوومەنی نوێنەران بەردەوام دەبێت لە کارکردن.
عەلی سەرای لە ڕاگەیەندراوێکدا گوتی: “بە هۆی ئازادی بیرکردنەوە و کاری سیاسی و گرنگیدان بە بەرژەوەندی گشتی، کشانەوەی خۆم لە هاوپەیمانی ئاوەدانکردنەوە و گەشەپێدان ڕادەگەیەنم و وەک پەرلەمانتارێکی سەربەخۆ کاردەکەم و سەر بە هیچ لایەنێکی سیاسی نیم”.
ئاماژەی بەوەشکرد، لە قۆناغی ئێستادا سەرنجی لەسەر خزمەتکردنی هاووڵاتیانی وڵاتەکەی دەبێت، دوور لە کەشوهەوای گرژی سیاسی و کاریگەرییەکانی کێبڕکێی سیاسی.
ئەم پێشهاتە دوای زنجیرەیەک کشانەوە دێت لە هاوپەیمانی ئاوەدانکردنەوە و گەشەپێدان، دیارترینیان کشانەوەی فراکسیۆنی ‘عەقد ئەلوەتەنی’ بوو، کە سەر بە سەرۆکی دەستەی حەشدی شەعبی فالح فەیاز و بزووتنەوەی سۆمەرییەکان بە سەرۆکایەتی ئەحمەد ئەسەدی، وەزیری پێشووی کار بوو.
پێشتریش پەرلەمانتار عەمار یوسف کشانەوەی خۆی لە هاوپەیمانییەکە ڕاگەیاندبوو.
