توێژینەوە زانستییە نوێیەکان دەریانخستووە گوێگرتن لە مۆسیقا، بەتایبەت کاتێک نەخۆش خۆی هەڵیدەبژێرێت، دەتوانێت ڕۆڵێکی بەرچاو لە کەمکردنەوەی هەستکردن بە ئازار لە کاتی نەخۆشی یان دوای نەشتەرگەریدا بگێڕێت و تەنانەت پێویستی بە بەکارهێنانی دەرمانی ئازارشکێن کەم بکاتەوە.
بەپێی ڕاپۆرتی ئاژانسی ئەسۆوشیەیتید پرێس، لە سەنتەری پزیشکیی یووسی سان دیێگۆ، پەرستاران هاوشانی چارەسەری پزیشکی، ئامێرە مۆسیقییەکانی وەک گیتار بۆ هێورکردنەوەی نەخۆشەکان بەکار دەهێنن؛ دەرکەوتووە ئەم هەنگاوە دەبێتە هۆی دابەزینی لێدانی دڵ و پەستانی خوێن و شکاندنی بازنەی دڵەڕاوکێ و ئازار لە نەخۆشخانەکاندا. لە ماوەی دوو دەیەی ڕابردوودا بەکارهێنانی مۆسیقا لە ناوەندە تەندروستییەکاندا ڕووی لە زیادبوون کردووە.
دکتۆر ئادەم هێنلی لە زانکۆی ویلایەتی فلۆریدا ڕوونی دەکاتەوە ئازار تێکەڵەیەکە لە هەستی جەستەیی و پەرچەکرداری دەروونی و سۆزداری، مێشکیش ڕۆڵی سەرەکی هەیە لە لێکدانەوەی پەیامەکانی ئازاردا، بۆیە مۆسیقا بە چالاککردنی تۆڕە بەرفراوانەکانی مێشک دەتوانێت ئەم تێگەیشتنە بگۆڕێت. هەروەها توێژینەوەیەکی زانکۆی ئیراسمۆسی هۆڵەندا کە لەسەر ٥٤٨ کەس ئەنجام دراوە دەریخستووە ئاستی خۆڕاگری بەرانبەر ئازار بە گوێگرتن لە چەشنە جیاوازەکانی مۆسیقا بەرز دەبێتەوە؛ گرنگترین خاڵیش ئارەزوو و شارەزاییی نەخۆشەکەیە لەسەر ئەو پارچە مۆسیقایە. توێژەران ئاماژە بەوە دەکەن کە هەڵبژاردنی مۆسیقا لەلایەن خودی نەخۆشەوە، هەستی کۆنترۆڵکردن لە ناخیدا بەهێز دەکات و کاریگەرییەکی ئەرێنی لەسەر باری دەروونیی درێژخایەنی دادەنێت.