وەزیری دادی تورکیا دەڵێت، تا ئێستا لە دەم پارتییەوە داواکاریی سەردانی دووەم بۆ دوورگەی ئیمڕاڵی پێشکەشی وەزارەتی داد نەکراوە.
یێڵماز تونچ، وەزیری دادی تورکیا بەر لە دەستپێکردنی کۆبوونەوەی فراکسیۆنی ئاکپارتی وەڵامی پرسیاری تایبەت بە دووەم سەردانی شاندی دەم پارتی بۆ لای عەبدوڵڵا ئۆجەلان، رێبەری زیندانیکراوی پەکەکەت دایەوە و گوتی: تا ئێستا داواکارییەکی لەمجۆرە بە وەزارەتەکەیان نەگەیشتووە و ئەگەر دەم پارتی داواکاریی بۆ سەردانی دووەم پێشکەش بکات، هەڵیدەسەنگێنن.
قسەکانی تونچ دوای ئەوە دێت، شاندی دەم پارتی دوای سەردانی دوورگەی ئیمڕاڵی، لەگەڵ تەواوی پارتە سیاسییەکانی نێو پەرلەمانی تورکیا کۆبوونەوە و وردەکارییەکانیان خستە بەرباس. چاوەڕێ دەکرێت سەردانێکی دیکەش بکرێت.
