ئەحمەد مەسعوود، سەرکردەی بەرەی بەرگریی نیشتمانیی ئەفغانستان، لە بەرپرسانی کۆماری ئیسلامیی ئێرانی ویست تیرۆرکردنی ئیکرامەدین سەریع، فەرماندەی پێشووتری پۆلیسی ویلایەتەکانی بەغلان و تەخار، و محەممەد ئەمین ئەلماس، یەکێک لە سەربازە پێشووەکانی ئەفغانستان لە تاران، بە شێوەیەکی جددی و شەفاف لێکۆڵینەوەی لەسەر بکەن.
ئەحمەد مەسعوود، بە بڵاوکردنەوەی گرتەیەکی ڤیدیۆیی گوتی هیوادارە ئێران ئەم جارە بە یەکلاکەرەوە مامەڵە لەگەڵ ئەم دۆسیەیەدا بکات. گوتیشی: “ئەگەر یەکەم جار بوایە، باشە، ڕووداوێکە و تێدەپەڕین، بەڵام ئەمە چەندەمین جارە ئەم ڕووداوە لە ناو کۆماری ئیسلامیدا ڕوو دەدات و چاوەڕوانیی گەلی ئەفغانستان و هەموو سەرکردە و کەسایەتییە گەورەکانی ئەفغانستان و ئێمە ئەوەیە کۆماری ئیسلامی ئەم بابەتە بە جددی وەربگرێت و لێکۆڵینەوەی لەسەر بکات.”
ئیکرامەدین سەریع و محەممەد ئەمین ئەلماس ڕۆژی چوارشەممە سێی کانوونی یەکەم (٢٤ی کانوونی یەکەم) لە گۆڕەپانی وەلیعەسر لە تاران کرانە ئامانجی تەقەکردن و کوژران. پارێزگاری تاران ڕایگەیاند لێکۆڵینەوە لەسەر ئەم دۆسیەیە بەردەوامە.
جەریانە سیاسییەکانی دژ بە تاڵیبان ئەم تیرۆرانە بە ئامانجدار و تیرۆریستی دەزانن، بەڵام تا ئێستا بەڵگەیەکی سەربەخۆ لەبارەی ئەنجامدەرانییەوە بڵاو نەکراوەتەوە و تاڵیبانیش لەمبارەیەوە هیچ لێدوانێکی نەداوە.
هەواڵی پێشوو