پۆلیسی ئیسرائیل هەواڵی دەستبەسەرکردنی کاتیی بەرپرسێکی باڵای نووسینگەی بنیامین ناتانیاهوو، سەرۆکوەزیرانی ئیسرائیلی بۆ ئەنجامدانی لێکۆڵینەوە بڵاو کردەوە.
ئەم هەنگاوە دوای ئەوە دێت گومان هەیە ناوبراو لە ڕەوتی لێکۆڵینەوەکاندا ئاڵۆزیی دروست کردبێت و زانیاریی هەستیاری دزە پێ کردبێت؛ ئەمەش بووەتە هۆی لاوازکردنی هەوڵەکان بۆ چەسپاندنی ئاگربەست لە کەرتی غەزە.
ئاژانسی هەواڵی “بلومبێرگ” لە زاری پۆلیسی ئیسرائیلەوە ڕایگەیاند ئەو بەرپرسە دوای ئەوەی لە دەرەنجامە یاساییەکانی کردەوەکانی ئاگادار کراوەتەوە، لێکۆڵینەوەی لەگەڵدا کراوە؛ بەبێ ئەوەی ناسنامەکەی یان وردەکاریی زیاتر لەبارەی جۆری سەرپێچییەکانی ئاشکرا بکرێت.
ئەم گۆڕانکارییانە لە کاتێکدا ڕوو دەدەن هەندێک لە ناوەندە ئیسرائیلییەکان، نووسینگەی سەرۆکوەزیران بە دزەپێکردنی بەئەنقەستی زانیارییەکان تۆمەتبار دەکەن، بە ئامانجی شکستپێهێنانی هەوڵەکانی گەیشتن بە ئاگربەست لە غەزە.
ئەو تۆمەتانەی ئاراستەی نووسینگەی ناتانیاهوو کراون، پەیوەندییان بە دزەپێکردنی زانیاریی نهێنی لەبارەی ڕەوتی دانوستانە ناڕاستەوخۆکانی ئاگربەستی کەرتی غەزەوە هەیە، کە هاوکات لەگەڵ گفتوگۆکان بۆ ئاڵوگۆڕی دیلەکان و ئاگربەستی کاتی بەڕێوە دەچوون.
بەپێی میدیا ئیسرائیلییەکان، دامەزراوە ئەمنی و دادوەرییەکان گومانیان لەوە هەیە زانیاری لەنێو نووسینگەی سەرۆکوەزیرانەوە بۆ میدیاکان یان لایەنە سیاسییەکان دزەی پێ کرابێت؛ بە ئاشکراکردنی وردەکاریی هەستیاری دانوستانەکان یان هەڵوێستەکانی ئیسرائیل پێش یەکلاکردنەوەی دیپلۆماسییان، یارمەتیدەر بوون بۆ لاوازکردنی دەرفەتی گەیشتن بە ڕێککەوتن.
ڕاپۆرتەکان ئاماژە بەوە دەکەن ئامانجی ئەگەری لەم دزەپێکردنە، کاریگەری دانان بووە لەسەر ڕای گشتیی ناوخۆ یان لاوازکردنی ڕێڕەوی ئاگربەست؛ ئەوەش لە کاتێکدا ئیسرائیل ڕووبەڕووی لێکترازانی سیاسیی ناوخۆیی و گوشاری توندی ڕەوتە ڕاستڕەوەکانی دژی هەر جۆرە ڕێککەوتنێک لەگەڵ حەماس بووەتەوە.
لێکۆڵینەوەکانی ئێستا لە چوارچێوەی دۆسیەگەلێک بە ناونیشانی “ئاڵۆزکردنی جێبەجێکردنی دادپەروەری” و “خراپ بەکارهێنانی پۆست” بەڕێوە دەچن. بەرپرسە فەرمییەکان دووپاتیان کردەوە ئەم لێکۆڵینەوانە دژی هیچ هەڵوێستێکی سیاسیی دیاریکراو نین، بەڵکوو جەخت لەسەر ئەگەری زیانگەیاندن بە بەرژەوەندییە باڵا ئەمنییەکانی ئیسرائیل دەکەنەوە.