ئەنتۆنیۆ کۆستا، سەرۆکی ئەنجوومەنی ئەوروپا، رۆژی دووشەممە لە پەیامێکدا لە تۆڕی کۆمەڵایەتی “ئێکس” رایگەیاند، هەر جۆرە هێرشکردنە سەر ژێرخانە مەدەنییەکان، بەتایبەتی دامەزراوەکانی وزە، کارێکی “نایاسایی” و “قبوڵنەکراوە”.
کۆستا لە پەیامەکەیدا جەختی لەوە کردەوە: “ئەم پڕەنسیپە هەم بۆ جەنگی رووسیا لە ئۆکرانیا راستە، هەم بۆ هەموو شوێنێکی دیکەی جیهان.” هەروەها ئاماژەی بەوە کرد کە خەڵکی سڤیلی ئێران قوربانیی سەرەکیی دەسەڵاتی وڵاتەکەیانن و لە ئەگەری پەرەسەندنی ئۆپەراسیۆنە سەربازییەکاندا، ئەوان دەبنە یەکەمین قوربانی.
سەرۆکی ئەنجوومەنی ئەوروپا بەبێ ئەوەی ناوی ئەمریکا یان ئیسرائیل بهێنێت، داوای هێورکردنەوەی دۆخەکە و کەمکردنەوەی گرژییەکانی کرد. لە بەشێکی دیکەی پەیامەکەیدا، کۆستا ئاشکرای کرد پەیوەندییەکی تەلەفۆنیی لەگەڵ مەسعود پزیشکیان، سەرۆک کۆماری ئێران ئەنجامداوە و تێیدا داوای وەستاندنی “دەستبەجێ”ی هێرشەکانی ئێرانی بۆ سەر وڵاتانی کەنداو و کردنەوەی رێڕەوی کەشتیوانیی بەسەر گەرووی هورمزدا کردووە.
