سوپای پاسداران ڕۆژی چوارشەممە ١٦ی گوڵان لە یەکەم کاردانەوەی فەرمیی ئێران بەرانبەر ڕاگرتنی ئۆپراسیۆنی دەریایی ئەمریکا لە گەرووی هورمز ڕای گەیاند بە کۆتاییهاتنی “هەڕەشەی دەستدرێژیکاران” و جێبەجێکردنی “ڕێکاری نوێ”، هاتوچۆی سەلامەت لەم ئاوڕێیەدا فەراهەم دەبێت.
فەرماندەیی هێزی دەریایی سوپا لە بەیاننامەیەکدا دەستخۆشی لە هاوکاریی خاوەن کەشتییەکان بۆ تێپەڕین لە گەرووی هورمز بەپێی “یاساکانی ئێران” کرد و گوتی کەشتییەکان لە پاراستنی تەناهیی دەریاوانیی ناوچەکەدا بەشدارییەکی باشیان هەبووە.
لەم بەیاننامەیەدا هیچ ڕوونکردنەوەیەک دەربارەی “ڕێکارە نوێیەکان” نەدراوە.
ئەم لێدوانانە دوای ئەوە هاتن دۆناڵد ترەمپ، سەرۆک کۆماری ئەمریکا شەوی سێشەممە ڕای گەیاند ئۆپراسیۆنی “پڕۆژەی ئازادی” بۆ پاسەوانیکردنی کەشتییەکان لە گەرووی هورمز بە شێوەیەکی کاتی ڕادەگیرێت تاوەکوو دەرفەت بۆ کۆتاییهاتنی ڕێککەوتنی پیشبینیکراو لەگەڵ ئێران بڕەخسێت.