نەتەوە یەکگرتووەکان: داخرانی گەرووی هورمز ٤٥ ملیۆن کەسی دیکە ڕووبەڕووی برسییەتی دەکاتەوە

خۆرخێ مۆریرا دا سیلوا، بەڕێوەبەری جێبەجێکاری نووسینگەی خزمەتگوزاریی پڕۆژەکانی نەتەوە یەکگرتووەکان و سەرۆکی ئەو گرووپەی بۆ ڕێگریکردن لە تەنگژە مرۆیییەکان پێکهێنراوە، لە گفتوگۆیەکدا لەگەڵ ئاژانسی هەواڵی فڕەنسایی گوتی: “ئەگەر بە زوویی ڕێگە بە تێپەڕبوونی پەینە کیمیایییەکان لە گەرووی هورمزدا نەدرێت، ڕەنگە دەیان ملیۆن کەس ڕووبەڕووی برسییەتی و قاتوقڕی ببنەوە.”
ناوبراو ئەمڕۆ دووشەممە گوتی: “تەنیا چەند هەفتەیەکمان لەبەر دەستە تا ڕێگری لەو کارەساتە مرۆیییە گەورەیە بکەین ئەگەری ڕوودانی هەیە.” ئەم بەرپرسەی نەتەوە یەکگرتووەکان هەروەها گوتی: “ڕەنگە شاھیدی تەنگژەیەک بین ٤٥ ملیۆن کەسی دیکە بەرەو برسییەتی و قاتوقڕی ببات.”