بەڕێزان/ بەڕێوەبەر و ستافی دەزگای چاپ و بڵاوکردنەوەی موکریانی
بەبۆنەی تێپەڕبوونی ٢٦ ساڵ بەسەر تەمەنی پڕ لە خزمەت و بەخششی دەزگاکەتان، گەرمترین پیرۆزبایی خۆمان ئاراستەی ئێوەی هێژا، سەرجەم نووسەران، وەرگێڕان و خوێنەرانی کوردستان دەکەین و، هیوای بەردەوامی و سەرکەوتنی زیاترتان بۆ دەخوازین.
دەزگای چاپ و بڵاوکردنەوەی موکریانی لە ماوەی زیاتر لە چارەگە سەدەیەک لە کارکردن و بەرهەمهێنان، وەک ناوەندێکی ڕەسەن و پێشەنگ، ڕۆڵێکی ئێجگار گرنگ و بەرچاوی گێڕاوە لە دەوڵەمەندکردنی کتێبخانەی کوردی و پێشخستنی بزووتنەوەی ڕووناکبیری و, وێستگەیەکی زۆر گرنگ بووە بۆ زیندووڕاگرتنی شاکارە نەمرەکانی نەتەوەکەمان.
لە پاڵ ئەوەشدا، لە ڕێگەی گرنگیدانێکی زۆر بە بزووتنەوەی وەرگێڕان و گواستنەوەی شاکار و دەقە ئەدەبییە جیهانییەکان بۆ سەر زمانی کوردی، پردێکی بەهێزی کولتووریی دروست کردووە کە خزمەتێکی مەزنە بە کرانەوەی هزریی نەتەوەکەمان.
لەم یادەدا، وێڕای بەرز نرخاندنی مێژووی پڕ سەروەری و کارنامەی درەوشاوەی دەزگاکەتان، ئومێدەوارین لە قۆناغەکانی داهاتووشدا، بە هەمان گوڕوتین و پرەنسیپی نیشتمانی و ڕۆشنبیرییانەوە، لە پێشەنگیدا بمێننەوە.
هەر سەرکەوتوو بن.
بەشی ڕۆشنبیری و ڕاگەیاندنی پ.د.ک
٤ـی تەممووزی ٢٠٢٦