کاوار رەسول نێروەیی
د ناڤبەرا پرۆسەیا دیمۆکراسی یا ساخلەم و ململانێیا حیزبی دا، سنورەکێ ئاشکرا یێ ئەخلاقی هەیە کو جوداهیێ دکەت د ناڤبەرا «هەڤرژیا سیاسی یا دروست» و «کەفتنا ئەخلاقێ سیاسی» دا. سیاسەت د جەوهرێ خۆ دا، هونەرێ برێڤەبرن و ئاڤادانکرنێیە ب رێیا فەلسەفە و ستراتیژێن روون، نە دابەزین بۆ ئاستێ لادانێن زمانەوانی و بەلاڤکرنا گوتارێن بێ رامان کو چ بهایەکێ زانستی و نیشتمانی بۆ جەماوەری ل دویڤ خۆ ناهێلن.
ل ڤان دوماهیان، گۆڕەپانا سیاسی یا هەرێما کوردستانێ شاهدییا جۆرەکێ نوی ژ پۆپۆلیزمێ دکەت، ئاراستەیەک کو ل شووینا پێشکێشکرنا بەدیلێن ئابووری، پڕۆژێن گەشەپێدانێ و پلانێن خزمەتکرنا گەنجان، پەنایێ دبەنە بەر نمایشێن شانوویی و زمانی یێن نزم. ئەڤ رەفتارە چ نینن ژبلی بەلگەیەکێ حاشا هەلنەگر ل سەر پاشڤەمان و ئیفلاسبوونا هزرێ د پرۆسەیا راوێژکاریا سیاسی دا.
دەما لایەنەک یان سەرکردەیەک نەشێت ب رێیا کارنامەیەکا بهێز ڕکبەرییا دەستکەفت و سەقامگیریا پارتی دیمۆکراتی کوردستان بکەت، نەچاردبیت ژبو تژیکرنا وێ بۆشاییێ ب زمانەکێ پر ژ کین و بێ ڕێزی پڕ دکەتن.
فەلسەفەیا سیاسی یا پارتی هەردەم ل سەر بنەمایێ دەولەتداری، راگرتنا بالانسا دیپلۆماسی، و پاراستنا قەوارێ دستوری یێ هەرێمێ هاتیە دانان. بەرسڤا راستی یا پارتی بۆ هەمی هێرش و کەمپینێن چەواشەکارییانە، هەردەم ل سەر عەردی هاتیە دان؛ ب رێیا ئاڤادانکرنا ژێرخانێ، دابینکرنا سەقامگیریێ، و ڕاگرتنا ناسنامەیا نیشتمانی، سەرەرایی وان هەمی ئاستەنگێن ناڤخۆیی و هەرێمایەتی دا.
جەماوەرێ هۆشیار و رەوشنبیرێ کوردستانێ، ب تایبەتی تەخا گەنجان، گەهشتینە ئاستەکێ ئۆتۆنۆمی یێ هۆشیاریێ کو بشێن جوداهیێ د ناڤبەرا (کارتێن فشارێ یێن دەمەکی)و (ستراتیژیەتا درێژخایەن یا حیزبەکا خودان پێگە) بکەن.
قۆناغا ئەڤڕۆ یا هەرێمێ، پتر ژ هەر دەمەکێ پێتڤی ب پێشبرکێیا داهێنانێ، بەرهەمهێنان، گەشەپێدانا مرۆڤی و لێکتێگەهشتنا سیاسی هەیە. ئەو نمایشێن زمانەوانی یێن کو تنێ بۆ کۆمکرنا لایک و ڤیوو کارڤەدنەوەیێن بلەز یێن سۆشیال میدیایێ دهێنە کرن، چ پێشڤەچوونێ پێشکێشی پێگەهێ هەرێمێ ناکەن، بەلکو د ڕاستی دا تنێ خزمەتا ئەجێندایێن دەرەکی و دۆژمنێن ئەزموونا دستوری یا کوردستانێ دکەن.
مێژوویێ سەلماندیە کو نمایشێن سڤک و بێ رامان و پۆپۆلیزم تەمەن کورتن، لێ ئەوا دمینیتن، بنەما و ڕەسەنایەتیا کارێ سیاسی و ئاڤادانکرنێیە.