سوپای ئەمریکا ڕایگەیاند، ڕۆژی یەکشەممە هێرشێکی نوێ دژی «دەیان ئامانجی» سەربازی لە ئێران تەواو کردووە و ئامادەیە بۆ دڵنیابوون لە بەردەوامبوونی ئازادی هاتووچۆی دەریایی لە کەنداوی هورمز.
فەرماندەیی ناوەندی هێزەکانی ئەمریکا (سێنتکۆم) لە ڕاگەیەنراوێکدا لە سەر پلاتفۆرمی «X» ڕۆژی دووشەممە ئاماژەی کرد کە ئامانجەکان بریتی بوون لە سیستەمەکانی بەرگری ئاسمانی، شوێنەکانی ڕاداری کەناری دەریا، تواناکانی مووشەکی، فرۆکەی بێ فڕۆکەوان (درۆن) و بەلەمە بچووکە خێراکان. هەروەها ڕایگەیاند کە لەم ئۆپەراسیۆنەدا جگە لە فڕۆکە شەڕکەرەکان و کەشتییە جەنگییەکانی ئەمریکا، لە درۆنی هێرشبەری یەک ئاراستەیی و بەلەمی بێ سەرنشینی هێرشبەری یەک ئاراستەییش بۆ یەکەم جار کەڵک وەرگیراوە.
لە لایەکی دیکەوە، سوپای پاسدارانی شۆڕشی ئیسلامی ئێران ڕایگەیاند کە هێزە دەریاییەکانی شەوی ڕابردوو ئۆپەراسیۆنێکیان ئەنجامدا بۆ ڕاگرتنی دوو کەشتیی «پێشێلکار» کە بە گوتەی ئەوان، بە تێکدانی سیستەمی پەیوەندی و ڕێنیشاندانیان، مەترسییان بۆ کەشتییە بازرگانییەکان لە کەنداوی هورمز دروست کردبوو. ئەم هەواڵەش بە گوێرەی ئاژانسی ڕۆیتەرز بڵاوکرایەوە.
ئەم پەرەپێدانی ڕووداوەکان دوای ئەوە هات کە فەرماندەیی ناوەندی هێزەکانی ئەمریکا ڕۆژی یەکشەممە ڕایگەیاند هێزەکانی لە کاتژمێر ٩:٠٠ی شەو بە کاتی گرینویچ، دەست بە موجێکی دیکە لە گوللەبارانەکان دژی ئێران کردووە، بە مەبەستی کەمکردنەوەی توانای ئێران بۆ هێرشکردنە سەر کەشتیوانانی مەدەنی و کەشتییە بازرگانییەکانی تێپەڕبوو لە کەنداوی هورمز.