شوێنەوارناسان لە گۆڕستانی دێرینی ئەقسەر گۆڕێکی سێ هەزار ساڵەیان دۆزییەوە. نووسین، نەخش و ژوورە ژێرزەوییە دۆزراوەکان بە شێوەیەکی سەرسوڕهێنەر ساغ ماونەتەوە. ئەم مەزارە وێنەیەکی ژیان و باوەڕەکانی پیاوێک بە ناوی “پاسر” نیشان دەدات.
شوێنەوارناسان لە نزیک شاری ئەقسەری میسر گۆڕێکی سێ هەزار ساڵەیان لە ژێر خاک دەرهێنا. وەزارەتی گەشتوگوزار و شوێنەواری میسر ڕای گەیاند ئەم گۆڕە لەلایەن پسپۆڕانی زانکۆی لایدنی هۆڵەندی لە گۆڕستانی دێرینی “شێخ عەبدولقورنە” لە نزیک ئەقسەر لە باشووری میسر دۆزراوەتەوە. شوێنەوارناسان بەپێی شێوازی هونەریی نووسینەکان گەیشتوونەتە ئەو ئەنجامەی گۆڕەکە بۆ سەردەمی ڕامسیس (نزیکەی ١٢٩٢ تا ١٠٧٠ پێش زایین) دەگەڕێتەوە.
ئەم کۆمەڵەیە لە حەوشەیەکی کراوە پێکهاتووە کە بۆ پەرستگایەکی تاشراو لە ناو بەرددا دەچێت. لە ژێر پەرستگاکەشدا ژوورەکانی ناشتنی ژێرزەوی هەن. بە گوتەی وەزارەتی شوێنەواری میسر، شوێنەوارناسان لە حەوشەی ئەم گۆڕەدا چەندین توخمی تەلارسازییان دۆزیوەتەوە کە بە باشی ماونەتەوە، لەوانە پلیکانەیەک بۆ چوونە ناو گۆڕەکە بەکار هاتووە.
لە ناو گۆڕەکەدا نووسراو بە ناوی “پاسر” دۆزراوەتەوە کە ئەو پیاوە لە کاتی نزا بۆ خوداوەندە جیاوازەکان و هەروەها لە تەنیشت هاوسەرەکەی بەرانبەر مێزی نەزرەکان نیشان دەدات.
نزیکەی هەفتەیەک پێش ئێستاش چەند گۆڕێکی تر بە تەمەنی نزیکەی دوو هەزار ساڵ لە کەناری دەریای ناوەڕاست لە میسر دۆزرانەوە. بەپێی ڕاپۆرتەکان، هەندێک لەو گۆڕانە بە دەستنەخۆراوی مابوونەوە. شوێنەوارناسان لەوێ پاشماوەی مرۆڤ و کەرەستەی گڵینیان دۆزیوەتەوە. یەکێک لە گرنگترین دۆزراوەکان ٢٤ پارچەی زێڕ بوو لە ناو دەمی چەند تەرمێکدا دانرابوون؛ ئەمەش نەریتێکی پەیوەندیدار بە ناشتن لە سەردەمی کۆندا بووە.
میسر بە شێوەیەکی ڕێکخراو هەواڵی دۆزینەوەی شوێنەواری بڵاو دەکاتەوە. بەرپرسانی ئەو وڵاتە هیوادارن ئەم دۆزینەوانە یارمەتیی گەشەکردنەوەی کەرتی گەشتوگوزار بدەن کە سەرچاوەیەکی گرنگی داهاتی میسرە.