قاسم ئەعرەجی، ڕاوێژکاری ئاسایشی نیشتمانیی عێراق جەختی کردەوە کە ڕۆڵەکانی عێراق کە بەشدارییان لە تێکشکاندنی تیرۆر و بەرگریکردن لە نیشتماندا کردووە جێگەی شانازی و سەربەرزیین، جەختیشی کردەوە کە کۆکردنەوەی چەک لە دەستی دەوڵەتدا بە مەبەستی پەراوێزخستن یان پشتگوێخستنی قوربانییەکانیان نییە.
ئەعرەجی لە ڕاگەیەندراوێکدا گوتی “ڕۆڵەکانی عێراق کە بەشدارییان لە تێکشکاندنی تیرۆر و بەرگریکردن لە نیشتمان کردووە، جێی شانازی و سەربەرزیی ئێمەن”، هەروەها ڕوونی کردەوە کە “کۆکردنەوەی چەک لە دەستی دەوڵەتدا بە مەبەستی پەراوێزخستن یان دەستبەرداربوون لە قوربانییەکانیان نییە، بەڵکو ئامانج لێی دروستکردنی چوارچێوەیەکی ڕێکخستنە کە پارێزگاری لە شەڕکەران و خێزانەکانیان بکات و مافە یاسایی و کۆمەڵایەتییەکانیان لەژێر چەتری یاسا و فەرماندەیی گشتیی هێزە چەکدارەکاندا زامنی بکات.”
ئاماژەی بەوەش کرد کە داڕشتنی پەیامە ڕاگەیاندنەکان پێویستی بە گرنگیپێدانی زۆر هەیە بۆ ئەوەی بە گیانی دڵنیایی و شەراکەتی نیشتمانی بگات، نەەک بە زمانی هەڕەشە. جەختیشی کردەوە کە ئاسایشی هاووڵاتی و سەقامگیریی شەڕکەران و خێزانەکانیان لە پێشینەی سەرەکیی کارەکانی حکومەتە.
ئەعرەجی ئاماژەی بەوەش کرد کە سەرنج و تێبینییە دڵسۆزانەکان لەبەرچاو دەگیرێن بۆ پەرەپێدانی پەیامی ڕاگەیاندن لە ڕێگەی کەناڵە فەرمییەکانەوە، بە شێوەیەک کە زامنی بڕینی ڕێگە لەبەردەم هەر هەوڵێک بکات بۆ قۆستنەوەی مەترسییەکان یان لارکردنەوەی ئامانجە نیشتمانییەکان.
