نێچیرڤان بارزانی، سەرۆکی هەرێمی کوردستان، ئەمڕۆ چوارشەممە لە پەیامێکدا لە تۆڕی کۆمەڵایەتیی (ئێکس)، هاوخەمیی قووڵی خۆی بۆ دکتۆر مەهدی بەحر ئەلعلوم و بنەماڵەکەیان دەربڕی، بەهۆی کۆچی دوایی چەند ئەندامێکی خێزانەکەیان لە ئەنجامی ڕووداوێکی دڵتەزێنی هاتوچۆدا.
سەرۆکی هەرێمی کوردستان لە پەیامەکەیدا ئاماژەی بەوە کرد کە بەوپەڕی خەم و پەژارەوە پرسە و سەرەخۆشیی ئاراستەی بنەماڵەی بەڕێزی بەحر ئەلعلوم دەکات بۆ ئەو کۆستە گەورەیەی بەسەریاندا هاتووە.
نێچیرڤان بارزانی لە بەشێکی دیکەی پەیامەکەیدا ڕایگەیاند: “هاوخەمیی قووڵی خۆمان بۆ ئەم کۆستە گەورەیە دەردەبڕین و لە خوای گەورە و میهرەبان داواکارین کۆچکردووان بە بەزەیی و لێبوردەیی خۆی شاد بکات و جێگەیان بەهەشتی بەرین بێت.”
لە کۆتایی پەیامەکەشیدا، سەرۆکی هەرێمی کوردستان هیوای سەبووری و ئارامیی بۆ کەسوکار و خۆشەویستانی کۆچکردووان خواست و هاوبەشیی خەمی خۆی بۆ ئەم ڕووداوە ناخۆشە دووپات کردەوە.