ئەحمەد شەرع، سەرۆککۆماری سووریا، پێشوازیی گەرمی لە بڕیارەکەی ویلایەتە یەکگرتووەکانی ئەمریکا کرد بۆ سڕینەوەی ناوی وڵاتەکەی لە لیستی ئەو دەوڵەتانەی پشتیوانی لە تیرۆر دەکەن. شەرع ئەم هەنگاوەی بە “کۆتاییهاتنی قۆناغێکی تاریک” و دەستپێکی سەردەمێکی نوێ بۆ ئاوەدانکردنەوەی سووریا وەسف کرد.
سەرۆککۆماری نوێی سووریا لە گوتارێکدا ڕایگەیاند: «ئەمڕۆ سووریا پەڵەیەکی تاریکی شەرمەزاری لەسەر خۆی لادەبات و لاپەڕەیەکی بەئازاری ڕابردوو دادەخات، تا لە ڕێگەی گەشەپێدان، ئاوەدانکردنەوە و نوێگەریدا هەنگاو بنێت.»
بڕیارەکەی واشنتن کە دوێنێ ڕاگەیەندرا، کۆتایی بە چەندین دەیەی گەمارۆ و سنووردارکردنی توندی ئابووری هێنا کە بەسەر حکوومەتەکەی بەشار ئەسەدا سەپێندرابوون. ئەم وەرچەرخانە سیاسییە دوای ئەوە دێت کە لە ساڵی ٢٠٢٤دا ڕژێمەکەی ئەسەد ڕووخا و دەسەڵاتێکی نوێ لە وڵاتەکەدا جێگیر بوو.
هاوکات لەگەڵ ئەم بڕیارەدا، وەزارەتی گەنجینەی ئەمریکا سوککردنی سزاکانی ڕاگەیاند و وەزارەتی دەرەوەش ناوی گرووپی “دەستەی تەحریری شام – HTS” (کە پێشتر بە بەرەی نوسرە دەناسرایەوە) لە لیستی ڕێکخراوە تیرۆریستییەکان دەرهێنا. ئەحمەد شەرع، کە پێشتر ڕێبەرایەتی ئەم گرووپەی دەکرد، توانی لە هێرشێکی خێرادا کۆتایی بە دەسەڵاتی ئەسەد بهێنێت.
حکوومەتی نوێی سووریا لە ئێستادا چاوی لەوەیە لە ڕێگەی ڕاکێشانی وەبەرهێنانی بیانییەوە، ژێرخانە وێرانبووەکانی وڵات کە بەهۆی زیاتر لە ١٠ ساڵ شەڕی ناوخۆوە لەناوچوون، نۆژەن بکاتەوە. لەو چوارچێوەیەدا، ئەسعەد شەیبانی، وەزیری دەرەوەی سووریا، بڕیارەکەی ئەمریکای بە “دەستکەوتێکی مێژوویی” ناوبرد و دووپاتی کردەوە کە حکوومەتەکەیان پابەندی ئاشتی و ئاسایشی نێودەوڵەتی دەبێت.
تورکیا یەکەم وڵات بوو کە بە فەرمی پێشوازی لەم بڕیارە کرد. وەزارەتی دەرەوەی تورکیا لە ڕاگەیەندراوێکدا ئاماژەی بەوە کرد کە ئەم هەنگاوە دەبێتە هۆی خێراکردنی پرۆسەی گەڕانەوەی سووریا بۆ ناو کۆمەڵگەی نێودەوڵەتی و چەسپاندنی سەقامگیری لە ناوچەکەدا.
بە دەرهێنانی ناوی سووریا لەو لیستە، لە ئێستادا تەنها سێ وڵات (ئێران، کۆریای باکوور و کووبا) لە لیستی وڵاتانی پشتیوانیکار لە تیرۆر لە لایەن ئەمریکاوە ماونەتەوە.