پەیڕەوکردنی رێجیمێکی نوێی خۆراکی، لەوانەیە ببێتە هۆی دابەزینی خێرای کێش لە ماوەی چەند رۆژێکدا. سەرەڕای ئەوەی ئەمە وەک دەستکەوتێک دەردەکەوێت، بەڵام بە واتای ئەوە نییە جەستە هەمان بڕی چەوری لەدەست دابێت، چونکە بەشێکی زۆری ئەو کێشەی لە سەرەتادا لەسەر کێشکێش دەردەکەوێت، پەیوەستە بە لەدەستدانی شلەکانەوە.
ناوەندەکانی کۆنترۆڵکردن و پێشگیریکردن لە نەخۆشییەکانی ئەمریکا روونیکردەوە، دابەزینی کێش بە شێوەیەکی هێواش و رێکخراو، کە رێژەکەی نێوان 0.5 بۆ 1 کیلۆگرامە لە هەفتەیەکدا، پەیوەندی بە دەرفەتی زیاترەوە هەیە بۆ پاراستنی ئەنجامەکان بەراورد بەو کەسانەی کێشیان بە خێرایی دادەبەزێت.
ئەم رێژەی دابەزینە بۆ هەموو کەسێک گونجاو نییە، چونکە پرۆسەکە بە شێوەیەکی راستەوخۆ پشت بە کێش، تەمەن، ئاستی چالاکیی جەستەیی، باری تەندروستی و جۆری ئەو دەرمانانە دەبەستێت کە کەسەکە بەکاریان دەهێنێت.
لە کاتی کەمکردنەوەی بڕی خۆراک، بەتایبەتی کاربۆهیدرات، جەستە دەستدەکات بە بەکارهێنانی کۆگای گلایکۆجینی ناو جگەر و ماسولکەکان بۆ دەستخستنی وزە. هەر گرامێک گلایکۆجین پەیوەندی بە چەند گرامێک ئاوەوە هەیە، بۆیە بەکارهێنانی ئەم کۆگایە دەبێتە هۆی دەرچوونی بڕێک شلە و دابەزینێکی خێرای کێش. کاتێک بەکارهێنانی کاربۆهیدرات زیاد دەکرێتەوە، جەستە بەشێک لەو گلایکۆجین و ئاوەی پەیوەستە پێیەوە وەردەگرێتەوە، بەمەش ژمارەی سەر کێشکێشەکە بەرز دەبێتەوە بێ ئەوەی بە واتای زیادبوونی بڕی چەوری بێت.
دابەزینی کێش تەنیا چەوری ناگرێتەوە، بەڵکو دەکرێت ئاو و بارستایی ماسولکەکانیش بگرێتەوە. رێژەی ئەم پێکهاتانە بەپێی توندی رێجیمەکە، ماوەکەی، بڕی پرۆتین و ئاستی چالاکیی جەستەیی دەگۆڕێت. کەمکردنەوەی زۆری کالۆری بۆ ماوەیەکی درێژخایەن دەکرێت ببێتە هۆی لەدەستدانی بارستایی ماسولکەکان و سەختیی دابینکردنی پێداویستییەکانی جەستە لە پرۆتین، ڤیتامین و کانزاکان.
رێجیمی زۆر کەم کالۆری لە هەندێک حاڵەتی دیاریکراودا و بە چاودێریی پزیشکی بەکاردەهێنرێت، بەڵام پەیڕەوکردنی بە شێوەی تاکەکەسی بۆ هەموو کەسێک گونجاو نییە، بەتایبەتی بۆ ئەو کەسانەی نەخۆشیی درێژخایەنیان هەیە یان ئەو دەرمانانە دەخۆن کە بەهۆی گۆڕانی خۆراک و کێشەوە کاریگەرییان لەسەر دەبێت.
لەگەڵ دابەزینی کێشی جەستە، ئەو بڕە وزەیەی جەستە پێویستی پێیەتی بۆ جووڵە و کارە رۆژانەییەکان کەم دەبێتەوە. هەروەها گۆڕانکاریی فیسیۆلۆژی روودەدات کە یارمەتیی جەستە دەدات خۆی لەگەڵ کەمیی کالۆریدا بگونجێنێت، ئەمەش دەکرێت ببێتە هۆی خاوبوونەوەی دابەزینی کێش یان گەیشتن بە قۆناغی جێگیریی کێش. سەرەڕای بڵاوبوونەوەی ئەو راسپاردانەی پشت بە کەمکردنەوەی نێوان 500 بۆ 750 کالۆری لە رۆژێکدا دەبەستن بۆ پێگەیشتووانی تووشبوو بە زیادبوونی کێش، بەڵام جێبەجێکردنیان پێویستە رەچاوی پێداویستییەکانی تاک بکات.
کێش دەکرێت رۆژانە بەهۆی شلەکان، بڕی خۆراک، خوێ و کاربۆهیدراتەوە بگۆڕێت، بۆیە خوێندنەوەیەک لەسەر کێشکێش بە تەنیا ئاماژە بە بڕی چەوری لەدەستدراو ناکات. بەدواداچوونی ئاراستەی گشتیی کێش لە ماوەی چەند هەفتەیەکدا سوودبەخشترە لەوەی مرۆڤ خۆی بە گۆڕانکارییە رۆژانەییەکانەوە سەرقاڵ بکات. ئامانجەکە گەیشتن بە کەمترین ژمارە لەسەر کێشکێش نییە، بەڵکو مەبەست دابەزاندنی کێشە بە شێوازێک کە بتوانرێت بەردەوامیی پێ بدرێت، لەگەڵ پاراستنی ماسولکەکان و دابینکردنی پێداویستییە خۆراکییەکانی جەستە.