توێژینەوەیەکی زانستی لە ژاپۆن دەریدەخات، پێکهاتەیەکی سروشتی لە بلوبێریو ترێدا هەیە کە شێوازی مامەڵەکردنی خانە ماسوولکەییەکان لەگەڵ چەوری دەگۆڕێت. ئەم پرۆسەیە لە رێگەی هاندانی شیبوونەوەی چەوری و کەمکردنەوەی کەڵەکەبوونی لەناو خانەکاندا روودەدات.
بەپێی ئەو توێژینەوەیەی لە گۆڤاری “فوود بایۆساینس” بڵاوکراوەتەوە، ئەنجامەکان بەو مانایە نین خواردنی بلوبێریببێتە هۆی دابەزاندنی کێش؛ چونکە تاقیکردنەوەکان تەنیا لەسەر خانەی ماسوولکەیی مشک لە تاقیگەدا کراون و هێشتا لەسەر ئاژەڵی زیندوو یان مرۆڤ تاقینەکراونەتەوە.
توێژینەوەکە تیشک دەخاتە سەر پێکهاتەی “پتیرۆستیڵبین” کە جۆرێکە لە پۆلیفینۆلە رووەکییەکان و بەشێوەیەکی سروشتی لە تووی شین، ترێ و جۆرەکانی دیکەی توودا هەیە. تیمێکی توێژەران بە سەرۆکایەتیی تاکاکازو میتانی، مامۆستای یاریدەدەر لە زانکۆی شینشوی ژاپۆن، کۆمەڵێک پێکهاتەی رووەکییان لەسەر خانەی ماسوولکەیی پەیکەریی مشک، کە بە “C2C12” ناسراون، تاقیکردووەتەوە.
دەرکەوتووە پتیرۆستیڵبین بەهێزترین کاریگەریی لە کەمکردنەوەی کەڵەکەبوونی چەوری لەناو خانەکاندا هەبووە، بێ ئەوەی رێگری لە گەشەکردن یان گۆڕانیان بۆ خانەی ماسوولکەیی پێگەیشتوو بکات. ئەو پێکهاتەیە رێگری لە چوونەژوورەوەی ترشە چەورییەکان بۆ ناو خانەکان نەکردووە، بەڵکو شێوازی مامەڵەکردنی خانەکانی لەگەڵیاندا گۆڕیوە.
توێژەران تێبینیی زیادبوونی دەردانی گلیسڕۆڵیان کردووە، کە ئاماژەیە بۆ شیبوونەوەی چەورییە کۆگاکراوەکان. هاوکات چالاکیی ئەو جینانە بەرزبووەتەوە کە پەیوەستن بە ئۆکساندنی ترشە چەورییەکانەوە، کە ئەو پرۆسەیەیە خانەکان بۆ گۆڕینی چەوری بۆ وزە بەکاری دەهێنن. خانە ماسوولکەییەکان لە تاقیکردنەوەکەدا زیاتر ئارەزووی شیکردنەوە و بەکارهێنانی چەورییان هەبووە، نەک هەڵگرتنیان وەک کۆگایەک لە ناویاندا.
کەڵەکەبوونی زۆری چەوری لەناو ماسوولکەکاندا پەیوەندی بە چەند هۆکارێکەوە هەیە، لەوانە سیستەمی خۆراکی دەوڵەمەند بە چەوری، کەمجووڵەیی و بەساڵاچوون. ئەم کەڵەکەبوونە دەتوانێت کاریگەری لەسەر توانای لەش بۆ گۆڕینەوەی سەرچاوەکانی وزە هەبێت و پەیوەستە بە نەخۆشییەکانی زیندەچالاکی.