شاندێکی تەکنیکیی وەزارەتی دارایی هەرێمی کوردستان لە بەغدا لەگەڵ وەزیری دارایی عێراق کۆبووەوە؛ لە کۆبوونەوەکەدا بەغدا بەڵێنی دا هاوشێوەی فەرمانبەرانی فیدراڵ، پرۆسەی پلەبەرزکردنەوەی فەرمانبەرانی هەرێمی کوردستان دەستپێبکاتەوە و ئاستەنگە ئیداری و داراییەکان چارەسەر بکات.
بەپێی زانیارییەکانی کۆبوونەوەکە، هەردوولا ڕێککەوتوون لەسەر ئەوەی پێوەرەکانی پلەبەرزکردنەوە بەپێی یاسای ڕاژەی شارستانیی کارپێکراو هاوتا بكرێن. ئەم هەنگاوە دەبێتە هۆی کۆتاییهێنان بە جیاوازییەکانی چەندین ساڵی ڕابردووی نێوان فەرمانبەرانی هەرێم و هاوتاکانیان لە دامەزراوەکانی حکومەتی فیدراڵدا.
هاوکات لە کۆبوونەوەکاندا تیشک خستراوەتە سەر دابینکردنی شایستە داراییەکانی تایبەت بە پلەبەرزکردنەوە لە چوارچێوەی بودجەی گشتیی فیدراڵدا.
ئامانج لەم ڕێککەوتنە گەرەنتیکردنی فەرمیی مافە یاساییەکانی فەرمانبەرانی هەرێمی کوردستانە، تاوەکو بە شێوەیەکی بەردەوام تەرخانکراوی دارایی پێویست بۆ شایستەکانیان لەلایەن بەغداوە دابین بکرێت.