فەرمانگەی پەیوەندییەکانی دەرەوەی حکومەتی هەرێمی کوردستان بە توندترین شێوە سەرکۆنەی بەئامانجگرتنی شانشینی عەرەبستانی سعوودیە بە فڕۆکەی بێفڕۆکەوان و هەوڵی بەئامانجگرتنی مەککەی پیرۆز دەکات، کە ئەمەش هەڕەشەیەکی مەترسیدارە بۆ سەر ئاسایشی شانشینەکە و سەلامەتی مەدەنییان و زیارەتکارانی ماڵی خودا.
دووپاتی دەکەینەوە کە ئاسایش، سەقامگیری، سەروەری و پارێزراوی خاکەکەی شانشینی عەرەبستانی سعوودیە، پێویستییەکی بنەرەتییە بۆ ئاسایش و سەقامگیری ناوچەکە، و هەر هێرشێک کە خاکەکەی بکاتە ئامانج یان مەدەنییان بخاتە مەترسییەوە، کارێکی رەتکراوە و سەرکۆنەکراوە.
بەئامانجگرتنی مەککەی پیرۆز بەو پێگەیەی کە هەیەتی لە ڕووی ئاینی و ڕۆحی مەزن لە لایەن موسڵمانانی جیهانەوە، پێشهاتێکی زۆر مەترسیدارە و سووکایەتییە بە پیرۆزییەکان و هەڕەشەیە بۆ سەر سەلامەتی میوانانی خوای میهرەبان، و ئەمەش پێویستی بە سەرکۆنەکردنی ڕوون و توند هەیە.
فەرمانگەی پەیوەندییەکانی دەرەوەی حکومەتی هەرێمی کوردستان هاوسۆزی تەواوی خۆی لەگەڵ شانشینی عەرەبستانی سعوودیە دەردەبڕێت بۆ پاراستنی ئاسایش، سەروەری، سەلامەتی هاوڵاتییانی، دانیشتووانی و میوانەکانی، و پشتگیری خۆی بۆ هەموو هەوڵەکان لە پێناو چەسپاندنی ئاسایش، ئاشتی و سەقامگیری لە ناوچەکەدا دووپات دەکاتەوە.
جەخت لەوە دەکەینەوە کە ناکۆکییەکان نابێت ببنە بیانوو بۆ بەئامانجگرتنی مەدەنییان، دامەزراوە مەدەنییەکان یان پیرۆزییە ئاینییەکان، و ڕێزگرتن لە سەروەری دەوڵەتان و پیرۆزی شوێنە ئاینییەکان و پاراستنی مەدەنییان دەبێت وەک بنەمایەکی نەگۆڕ بمێننەوە کە نابێت پێشێل بکرێن.
فەرمانگەی پەیوەندییەکانی دەرەوە
حکومەتی هەرێمی کوردستان
حکومەتی هەرێمی کوردستان