سەرچاوەیەکی حکومی، ئاشکرای کرد کە ئاراستەیەک هەیە بۆ گونجاندنی کۆمەڵێک ڕێکاری بەرفراوان بە مەبەستی کۆنتڕۆڵکردنی خەرجییە گشتییەکان و کەمکردنەوەیان لە چوارچێوەی پرۆژەیاسای بودجەی فیدراڵیی ساڵی 2027دا؛ ئەمەش لێکۆڵینەوە لە تێکەڵکردنی هەندێک دەستەی سەربەخۆ، پێداچوونەوە بە مووچەی بڕێک لە توێژەکان و مووچەی خانەنشینیی بەرپرسان دەگرێتەوە، لە چوارچێوەی هەوڵەکانی حکومەت بۆ بەرەنگاربوونەوەی قەیرانی دارایی وڵات.
سەرچاوەکە لە لێدوانێکدا بۆ ئاژانسی “شەفەق نیوز” ڕایگەیاند کە تیمی حکومیی ڕاسپێردراو لەلایەن عەلی ئەلزەیدی، سەرۆکی ئەنجومەنی وەزیران، بۆ لێکۆڵینەوە لە قەیرانی دارایی و دۆزینەوەی چارەسەری گونجاو، بە هاوئاهەنگی لەگەڵ لیژنەی یاسایی لە ئەنجومەنی نوێنەران، کۆمەڵێک پێشنیازیان بە مەبەستی کەمکردنەوەی بارگرانیی دارایی لەسەر خەزێنەی دەوڵەت و سنووردارکردنی خەرجییە ناپێویستەکان پێشکەش کردووە.
پێشنیازەکان بریتی بوون لە: لێکۆڵینەوە لە واقیعی کەرتی نەوت و میکانیزمەکانی هەناردەکردنی نەوتی خاو، تێکەڵکردنی هەندێک دەستەی سەربەخۆ، توندکردنەوەی چاودێری لەسەر جوڵەی دۆلار، جگە لە کەمکردنەوەی خەرجییەکانی حکومەت و پێداچوونەوە بە مووچەی هەندێک توێژ و مووچەی خانەنشینیی ژمارەیەک لە بەرپرسان.
تیمی حکومی بە مەبەستی ڕێگریکردن لە دروستبوونی ناکۆکیی سیاسی سەبارەت بە ڕێکارە پێشنیازکراوەکان، ئاڕاستەی ئەوەیان هەڵبژاردووە کە بڕگەیەکی گشتی لە پرۆژەی بودجەی 2027دا بگوێزرێتەوە کە ڕێگە بدات بە دواخستنی پابەندبوونی دارایی و ڕێکارە قورسەکان لەسەر شانی دەوڵەت لە ساڵی دارایی داهاتوودا، بە مەرجێک کاریگەریی نەرێیی لەسەر بەرژەوەندیی گشتیی هاووڵاتییان نەبێت.
ئەم هەنگاوە نەرمییەکی زیاتر دەباتە بەردەست حکومەت تا بەپێی توانای دارایی بەردەست، کار لەسەر بەڕێوەبردنی خەرجییەکان و دیاریکردنی پێشینەی بەکاربردن بکات، لەجیاتی چوونە ناو وردەکارییەک کە ببێتە هۆی ناڕەزایەتی لایەنە پەیوەندیدارەکان.
بەپێی خەمڵاندنە سەرەتاییەکان بۆ پرۆژەی بودجەی 2027، کۆی خەرجییەکان نزیکەی 217 تریلیۆن دینارە و کورتهێنانی بودجەکەش لە 40 تریلیۆن دینار تێدەپەڕێت، بە جۆرێک نرخی خەمڵێندراوی نەوت بە 58 دۆلار بۆ هەر بەرمیلێک دیاری کراوە.
دارایی گشتیی عێراق ڕووبەڕووی گوشاری جدی بووەتەوە بەهۆی دابەزینی داهاتی نەوت و تێکچوونی پرۆسەی هەناردەکردن، لە بەرامبەر بەرزبوونەوەی پابەندبوونی کارگێڕی کە لە سەرووی هەموویاندا مووچەی فەرمانبەران، خانەنشینان و خەرجییەکانی پاراستنی کۆمەڵایەتین.
پێشتر وەزارەتی دارایی لە 27ی ئەیلوولی 2026دا ڕایگەیاندبوو کە پرۆژەی بودجەی 2027 ڕەوانەی ئەنجومەنی وەزاری بۆ ئابووری کراوە دوای تەواوبوونی قۆناغەکانی ئامادەکردنی، تا ڕەوانەی دەسەڵاتی یاسادانان بکریت.