مارک زوکەربێرگ، بەڕێوەبەری جێبەجێکاری کۆمپانیای مێتا (Meta)، پەردەی لەسەر نوێترین و پێشکەوتووترین مۆدێلی ژیریی دەستکردی کۆمپانیاکەی بە ناوی Muse Wonder لادا؛ مۆدێلێک کە بە گوتەی ناوبراو گەورەترین و بەتواناترین بەرهەمی مێتایە تا ئەمڕۆ و توانای ڕکابەریکردنی ڕاستەوخۆی لەگەڵ کۆمپانیا گەورەکانی وەک OpenAI و Anthropicدا هەیە.
مێتا لە ڕاگەیەندراوێکدا ئاشکرای کرد کە خێزانی Wonder لە دوو وەشان پێکدێت: Muse Wonder کە مۆدێلێکی بچووکترە بۆ ڕاپەڕاندنی کارە ڕۆژانەیییەکان، و Wonderful کە وەشانە بەتواناترەکەیە.
ئەم مۆدێلانە توانای جێبەجێکردنی ئەرکی ئاڵۆزیان لە بوارەکانی یاسا، دارایی و تەندروستیدا هەیە، جگە لە پێشکەشکردنی ئاستێکی بەرزی پرۆگرامسازی (Code) بۆ دروستکردنی یاری و ئەپڵیکەیشنە نوێیەکان.
بڕیاری بەکارهێنانی ئەم مۆدێلانە پێویستی بە بەشداربوونی مانگانە هەیە کە تێچووەکەی لە نێوان 20 تا 100 دۆلاردایە.
یەکێک لە دیارترین تایبەتمەندییە نوێیەکان بریتییە لە هەبوونی «بیرگەی چالاک» (Active Memory) کە ڕێگە بە مۆدێلەکە دەدات لە درێژەی کاتدا بەدواداچوون بۆ ئەرکەکان بكات و وردەکارییەکانی ڕابردوو بەبیر بهێنێتەوە.
مێتا بۆ قەرەبووکردنەوەی دواکەوتنی لە ڕکابەرەکانی، وەبەرهێنانێکی بەرفراوانی لە بواری ژیریی دەستکرددا کردووە؛ لەوانە لە حوزەیرانی 2025دا بڕی 14.3 ملیار دۆلاری لە کۆمپانیای Scale AI وەبەرهێنا و ئەلێکساندەر وانگ، بەڕێوەبەری جێبەجێکاری ئەو کۆمپانیایەی بۆ سەرپەرشتیکردنی تاقیگەکانی Meta Superintelligence دامەزراند.
زوکەربێرگ جەختی کردەوە کە مێتا خستنەڕووی Museی بۆ چەند مانگێک دواخست تا جەخت بکاتە سەر لایەنی سەلامەتی و ئاسایش.
مانگی ڕابردوو، سەرۆکی مێتا لەگەڵ پێنج بەڕێوەبەری باڵای کۆمپانیا تەکنەلۆژییەکانی ئەمریکا بەڵێننامەیەکی پێشنیازکراوی دوناڵد ترامپ، سەرۆکی ئەمریکایان بۆ زیادکردنی ڕێکارەکانی سەلامەتی پێش بڵاوکردنەوەی مۆدێلە نوێیەکان واژۆ کرد.
سەرکردەکانی Anthropic و OpenAI و Google بەهۆی دەرچوونی هەندێک مۆدێل لە ژینگەی تاقیکاریی خۆیان، جەختیان لەسەر پێویستیی ڕێکخستنی خێرایی گەشەسەندن و هێواشکردنەوەی پرۆسەکە کردووەتەوە تا دڵنیایی لە سەلامەتیی تەواوەتیی ئەم تەکنەلۆژیایە بەدەست بێت.