باران دەبارێت و پلەکانی گەرماش نزم دەبنەوە

بەڕێوەبەرایەتیی گشتیی کەشناسی و بوومەلەرزەزانیی هەرێمی کوردستان، ڕاپۆرتی کەشوهەوای 48 کاتژمێری داهاتووی بڵاوکردەوە و تێیدا ئاماژە بە شەپۆلێکی بارانبارین و ناسەقامگیریی کەشوهەوا دەکات کە زۆربەی ناوچەکانی هەرێم دەگرێتەوە.

ئاسمان لە زۆربەی کاتەکاندا بە تەواوی هەور دەبێت. لە کاتەکانی ئێوارەوە ئەگەری چالاکبوونی هەورەبرووسکە و بارینی بارانێکی کەم لە کات و شوێنی جیاجیادا هەیە. لە درەنگانی شەودا، ڕێژەی دابارین زیاتر دەبێت، بەتایبەتی لە پارێزگاکانی هەولێر، سلێمانی، هەڵەبجە، لەگەڵ باشوور و باشووری ڕۆژهەڵاتی پارێزگای دهۆک، ئیدارەکانی سۆران، ڕاپەڕین، و بەشێک لە سنووری ئیدارەی گەرمیان.

پێشبینیی بەرزترین پلەکانی گەرمای ئەمڕۆ چوارشەممە:
گەرمیان 31 پلە، چەمچەماڵ و ئاکرێ 28 پلە، هەولێر، سلێمانی، دهۆک و زاخۆ 27 پلە، هەڵەبجە 26 پلە، پیرمام 25 پلە، و حاجی ئۆمەران 20 پلەی سیلیزی دەبێت.

له‌ کاتەکانی بەیانییەوە تا نیوەڕۆ، کاریگەریی بارانبارین و هەورەتریشقە لەسەر چەندین ناوچە بەردەوام دەبێت، لەوانە ئیدارەی سۆران و ناوچە شاخاوییەکانی، بەشێک لە پارێزگای هەولێر، ئیدارەی ڕاپەڕین، بەشێک لە سنووری سلێمانی و هەڵەبجە، لەگەڵ ناوچە جیاجیاکانی ئیدارەی گەرمیان. دوای نیوەڕۆ، کاریگەریی شەپۆلەکە کەم دەبێتەوە و ئاسمان دەگۆڕێت بۆ پەڵەهەور و نیمچەهەور.

پێشبینیی بەرزترین پلەکانی گەرمای سبەی پێنجشەممە:
گەرمیان 31 پلە، ئاکرێ 29 پلە، هەولێر، دهۆک، زاخۆ و چەمچەماڵ 28 پلە، سلێمانی و هەڵەبجە 27 پلە، پیرمام 26 پلە، و حاجی ئۆمەران 20 پلەی سیلیزی دەبێت.