ئه‌مڕۆ چوارشه‌ممه 22ـی ئایاری 2024، كاره‌كانی كۆنگره‌ی 44ـمینی شاره فڕانكۆفۆنییه‌كان له شاری لۆزانی وڵاتی سویسرا له ژێر ناونیشانی (هاوكاری نێوده‌وڵه‌تی و ده‌سه‌ڵاته جۆجێییه‌كان، نێوه‌ندێك بۆ داهێنان) ده‌ستیپێكرد.
ئومێد خۆشناو پارێزگاری هه‌ولێر به فه‌رمی وه‌ك ئه‌ندامی كۆنگره بانگهێشتی كۆنگره‌كه كراوه، تێیدا 500 پارێزگار و سه‌رۆكی شاره‌وانی و قایمقام له 50 وڵاتی جیاوازی جیهان به‌شدارن.
له رۆژی یه‌كه‌مدا چه‌ندین په‌نێڵ له‌باره‌ی پرسه‌كانی گه‌شتوگوزار و گۆڕانكارییه‌كانی كه‌شوهه‌وا و پێشكه‌وتنی شاره‌كان و چه‌ندین بابه‌تی دیكه به‌ڕێوه‌ده‌چن و گفتوگۆی تێر و ته‌سه‌لیان له‌باره‌وه ده‌كرێت.
كۆنگره‌كه تاكو 24ـی ئه‌م مانگه به‌رده‌وام ده‌بێت، جیا له به‌ڕێوه‌چوونی په‌نێڵه‌كان، رۆژی یه‌كه‌م ته‌رخان ده‌كرێت بۆ به‌دواداچوونی به‌رنامه هاوبه‌شه‌كان و كۆبوونه‌وه‌ی كۆمیسیۆنه هه‌میشه‌ییه‌كان، هه‌روه‌ها رۆژی دووه‌میش تایبه‌ت ده‌بێت بۆ گفتوگۆكردن له‌باره‌ی ناونیشانی كۆنگره‌كه (هاوكاری نێوده‌وڵه‌تی و ده‌سه‌ڵاته خۆجێییه‌كان، نێوه‌ندێك بۆ داهێنان)، دوا رۆژی كۆنگره‌كه‌ش به گوێره‌ی به‌رنامه‌ی كار، تایبه‌ت ده‌بێت به ئه‌نجامدانی كۆبوونه‌وه‌ی گشتی.
