ئەحمەد زەیدئابادی، ڕۆژنامەنووس و شرۆڤەکاری ڕیفۆرمخوازی ئێرانی، بە پێگەی ”بەغداد ئەلیوم”ی گوتووە، مەسعوود پزیشکیان، سەرۆککۆماری نوێی ئێران، کاریگەریی لەسەر سیاسەتی دوورمەودای ئێران سەبارەت بە گرووپەکانی بەرەی مقاومە لە ڕۆژهەڵاتی نێوەڕاست نابێت.
زەیدئابادی دەڵێت: دۆسیەی پێوەندیی ئێران و گرووپەکانی بەرەی مقاومە لە عێراق، سووریا، لوبنان، فەڵەستین و یەمەن لە دەرەوەی دەسەڵاتی سەرۆک‌کۆمارە و لە دەست هێزە سەربازییەکان، بەتایبەت لە ژێر دەستەڵاتی فەیلەقی قودسی سوپای پاسداران و ئەنجومەنی ئاسایشی نیشتمانی دایە.
زەیدئابادی جەخت لەوەش دەکاتەوە، هەر حکوومەتێک لە ئێران بێتە سەر کار، پێویستە پشتیوانیی سیاسی لە بەرەی مقاومە، بەتایبەت کێشەی فەڵەستین بکات. بەڵام پێدانی چەک و مووشەکی بالیستی بەم گروپانە لەلایەن دامەزراوە سەربازییەکان و ئایەتوڵلا خامنەییەوە بڕیاری لێ دەدرێت و تا ئێستاش هیچ گۆڕانکارییەک بۆ ئەم پشتیوانییانە بەدی ناکرێت.