وەزارەتی دارایی راگەیەندراوێكی بڵاوكردەوە و پەیامێك ئاراستەی فەرمانبەرانی گرێبەست دەكات
وەزارەتی دارایی رایدەگەیەنێت، ئاوات شێخ جەناب وەزیری دارایی هەرێم لەگەڵ نوێنەری فەرمانبەرانی گرێبەست كۆبووەوە و رایگەیاند، “كاری جددیمان بۆ بەهەمیشەییكردنی فەرمانبەرانی گرێبەست كردووە”.
بەپێی راگەیەندراوێكی وەزارەتی دارایی هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە، ئەمڕۆ دووشەممە، ئاوات شێخ جەناب، وەزیری دارایی و ئابوری پێشوازی لە نوێنەرانی فەرمانبەرانی گرێبەست لە هەرێمی كوردستان كرد.
لە راگەیەندراوەكەدا هاتووە وەزیری دارایی تیشكی خستە سەر هەوڵەكانی وەزارەت و لیژنەی باڵای ئەنجومەنی وەزیران كە لە رۆژی 8ی ئایاری 2024 بەمەبەستی گەڵاڵەكردنی بڕیارێكی دروست لەبارەی بەهەمیشەیكردنی فەرمانبەرانی گرێبەست لەڕووی یاسایی و كارگێڕی و داراییەوە پێكهێنراوە تابتوانن هاوشێوەی فەرمانبەرانی هەمیشەیی مافەكانیان پارێزراو بێت.
وەزیری دارایی راشیگەیاندووە، لە ماوەی رابردوو لیژنە باڵاكە كۆبوونەوەی خۆیان كردووە و ئێستا دۆسیەكە رەوانەی ئەنجومەنی راژە كراوە بۆ ئەوەی رێكارە هونەری و ئیدارییەكان تەواوبكرێن، هاوكات لەگەڵ وەزارەتی دارایی حكومەتی عێراق و ئەنجومەنی وەزیرانی هەرێمی كوردستان لەسەر هێڵن بۆ تەرخانكردنی دارایی و دیاریكردنی میلاكاتی پێویست لەسەر ئاستی وەزارەت و دامودەزگا پەیوەندیدارەكان.
بەپێی راگەیەندراوەكە، نوێنەری فەرمانبەرانی گرێبەست هیوایان خواست لە نزیكترینكاتدا پرسی بەهەمیشەیكردنی فەرمانبەرانی گرێبەست بچێتە بواری جێبەجێكردنەوە بە پێی ئەو میكانیزم و ڕێكارانەی لە نێوان حكومەتی هەرێم و حكومەتی عێراق رێككەوتنی لەسەر دەكرێت.