زۆرن ئەو كەسانەی گرنگی بەرچاو بە بوونی شیر و بەرهەمەكانی لە سیستمی خۆراكی رۆژانەیاندا دەدەن و بە تەندروستی دەزانن، بەڵام ئایا بە راستی پێویستە، یان دەتوانرێت بگۆڕدرێت بە خۆراكی دیكە؟
بەپێی راپۆرتێكی دامەزراوەی “Consumer Reports”ی قازانج نەویست، كە رۆژنامەی (واشنتن پۆست) بڵاویكردووەتەوە، زانیاریی دژیەك هەیە دەربارەی پێویستیی بە شیرەمەنی و تەنانەت سوودەكەشی، بەتایبەت لە سایەی بوونی بڕێكی زۆری بەرهەمی نوێی بێ چەوری و رووەكی، كە بازاڕەكانی پڕكردووەتەوە.
گرنگیی شیر و بەرهەمە شیرەمەنییەكان، خۆی دەبینێتەوە لەو سەرچاوە خۆراكییانەی تیایاندایە و یارمەتی كەمكردنەوەی لەدەستدانی ماسولكە و ئێسكی پەیوەندیدار بە تەمەنەوە دەدات.
كوپێك لە شیر هەشت گرام پرۆتین و، نزیكەی چارەكێكی پێویستیی رۆژانەی كالسیۆم و 14%ی پێویستیی رۆژانەی ڤیتامین دی تیایە، سەرەڕای مەگنسیۆم و پۆتاسیۆم و ڤیتامین بی 12 و زۆرێك لە سەرچاوەكانی دیكە، بەپێی “Consumer Reports”.
بەهەمان شێوە پەنیر، كەرە و بەرهەمە شیرەمەنییەكانی دیكە ئەم جۆرە سەرچاوە خۆراكییانەیان تیایە.
بژاردەكانی دیكە
لەگەڵ ئەوەشدا، دەكرێت بەتەواوی واز لە شیر و بەرهەمە شیرەمەنییەكان بهێنرێت، ئەگەر سیستمە خۆراكییەكەت كۆمەڵێكی جۆراوجۆری خۆراكی تەندروستیی دیكەی تیابێت، وەك سەلەمون و سەوزەكان، وەك ئەوەی چاوبینگ لی، سەرۆكی بەشی خۆراك لە كۆلێجی دیڤید گیڤینی پزیشكی لە زانكۆی كالیفۆرنیا دەیڵێت.
ئەمەش مانای گۆڕینی شیری مانگا بە شیری رووەكی نادات كە بەمدواییە بڵاوبوونەتەوە، بەپێی راپۆرتەكە، چونكە شیرە رووەكییەكانی وەك شیری بادەم، شۆفان و گوێزهند كالسیۆم و ڤیتامین (ئەی و دی) دەستەبەر دەكەن، بەڵام ڤیتامین بی 12یان تیانییە، هەروەك بڕێكی كەم پرۆتینیان تیایە، سەرەڕای بڕێكی كەمتری مەگنسیۆم، پۆتاسیۆم، ڤیتامین و كانزاكانی دیكە.
پسپۆران رێنوێنی دەكەن بەوەی لەكاتی هەڵبژاردنی شیری رووەكی، پێویستە دڵنیاببیتەوە لەوەی كالسیۆم و ڤیتامین دی تیابێت.
هەرچی سەبارەت بە شیری بێ چەوری هەیە، بڕی كالۆری لە كوپێكدا كەمترە بە نزیكەی تەنها 20 كالۆری، بەراورد بە شیری كەم چەوری.
توێژینەوە نوێیەكان ئاماژە بەوەدەكەن كە ئەو چەورییەی لە شیردا هەیە پەیوەندی بە زیادبوونی كێش یان تووشبوون بە نەخۆشیی شەكرە لە جۆری دووەم یان نەخۆشییەكانی دڵ و هەوكردنەوە نییە.
لە كۆتاییشدا راپۆرتەكە ئاماژەدەدات، هەندێك كەس گرفتیان لە هەرسكردنی شیرەمەنییەكانیان هەیە بەهۆی لاكتۆزەكەی ناویەوە، ئەوان دەتوانن سوود لە سیستمێكی خۆراكیی تەندروست وەربگرن لەجیاتی شیر و بەرهەمەكانی.