بە چاودێری و ئامادەبوونی ئاریان سەلاحەدین، بریکاری وەزارەتی رۆشنبیری و لاوانی حکومەتی هەرێمی کوردستان، لە شاری هەولێر شەشەم فێستیڤاڵی کولتووری بەڕێوەبەرایەتی گشتیی رۆشنبیری و هونەری تورکمان بەڕێوەچوو.
فێستیڤاڵەکە سێشەممە 27ی ئابی 2024، لە ماڵی تورکمانیی بە ئامادەبوونی ژمارەیەک لە ڕۆشنبیر و هونەرمەندانی پێکهاتەی تورکمان بەڕێوەچوو.
لە وتەیەکدا، ئاریان سەلاحەدین، بریکاری وەزارەتی ڕۆشنبیری و لاوان ڕایگەیاند، لە کابینەی نۆیەمی حکومەتی هەرێمی کوردستان، وەزارەت بەو پەڕی بایەخەوە گرنگی بە گەشەکردن و بوژاندنەوەی کولتوور و هونەری پێکهاتە جیاجیاکانی هەرێمی کوردستان دەدات.
وتیشی: دامەزراندنی بەڕێوەبەرایەتییە گشتییەکانی ڕۆشنبیری و هونەری پێکهاتەکان بەڵگەیە لەسەر هەوڵەکانی حکومەت بۆ ڕێکخستنی ئەو بوارانەی ژیانی پێکهاتەکان و خزمەتکردن و پێشخستنیان.
شەشەم فێستیڤاڵی کولتووری تورکمانی لە لایەن بەڕێوەبەرایەتیی گشتیی ڕۆشنبیری و هونەری تورکمان سازکرابوو و تێیدا وێڕای کردنەوەی پێشانگەیەکی فۆتۆگرافی، پانێلێکی تایبەت بە پرسە ڕۆشنبیرییەکان سازکرا و چەندین چالاکی دیکەی هونەری لەوانە پێشکەشکردنی گۆرانی و ژەنینی میوزیکی تورکمانی لە خۆ گرتبوو.
